ექს-პრეზიდენტ მიხეილ სააკაშვილის ადვოკატებმა 11 აპრილს სტრასბურგის სასამართლოს დროებითი ღონისძიების გამოყენების თხოვნით მიმართეს.
ეს ინფორმაცია „ნეტგაზეთს“ ევროპის ადამიანის უფლებათა სასამართლოს პრეს-სამსახურმა წერილობითი კომუნიკაციისას დაუდასტურა.
როგორც სასამართლოში ამბობენ, 14 აპრილს სასამართლომ გადაწყვიტა, რომ თხოვნასთან დაკავშირებით ნებისმიერი სახის გადაწყვეტილების მიღებამდე მოსარჩელისგან [სააკაშვილის მხარე] და საქართველოს მთავრობისგან რამდენიმე კითხვაზე პასუხის მიღებით დამატებითი ინფორმაცია მიიღოს.
11 აპრილს ექს-პრეზიდენტის დედამ, გიული ალასანიამ განაცხადა, რომ სტრასბურგის ადამიანის უფლებათა ევროპულ სასამართლოს მიმართეს.
სააკაშვილის ადვოკატები საქმის დეტალებზე არ საუბრობენ.