მარიუპოლის თეატრში, რომელიც რუსი სამხედროების მიერ დაიბომბა და განადგურდა – ადამიანები გადარჩნენ. ჯერჯერობით უცნობია როგორც გადარჩენილთა, ასევე, დაღუპულთა რიცხვი.

ინფორმაციას ამის შესახებ რადას დეპუტატი ავრცელებს.

„საშინელი ღამის შემდეგ, უვიცი ომის 22-ე დილას, საბოლოოდ კარგი ამბები გვაქვს მარიუპოლიდან. თავშესაფარმა გაუძლო. ნანგრევების გაწმენდა დაიწყო, ხალხი ცოცხალი გამოდის“, – წერს რადას დეპუტატი სერგიი ტარუტა.

მანამდე განცხადება გაავრცელა უკრაინის პროკურატურამ.. უწყებამ განაცხადა, რომ მარიუპოლის თეატრში, „სადაც ათასობით მშვიდობიანი ადამიანი თავშესაფარში იმყოფებოდა, ძირითადად კი- ქალები და ბავშვები“, არიან დაშავებულებიც – მათ შორის, ბავშვებიც. უწყება დასძენს, რომ მათი ზუსტი რაოდენობა უცნობია.

მარიუპოლის თეატრში გუშინ, რუსეთის შეჭრიდან 21-ე დღეს დაიბომბა. სხვადასხვა წყაროების თანახმად, აქ 1000-ზე მეტი მშვიდობიანი მოქალაქე იმყოფებოდა. თეატრი დაბომბეს იმის მიუხედავად, რომ მის წინ მოედანზე დიდი ასოებით ეწერა – „ბავშვები“.