ბრიტანეთის პრემიერ-მინისტრმა ბორის ჯონსონმა პარლამენტს რამდენიმე წუთის წინ გააცნო ახალი სანქციების ნუსხა, რომელიც რუსეთს დაეკისრება.
ჯონსონი აღნიშნავს, რომ რუსეთთან ერთად სანქციები გავრცელდება ბელარუსზეც, უკრაინაში რუსეთის შეჭრის გამო სანქციების სია ასე გამოიყურება:
- ყველა მსხვილი რუსული ბანკის აქტივები გაიყინება და გაითიშება დიდი ბრიტანეთის ფინანსური სისტემიდან. როგორც BBC აღნიშნავს, ამ შეზღუდვის შემდეგ ბრიტანეთის გავლით ვერანაირი ფინანსური ტრანზაქცია ვერ განხორციელდება. აღნიშნული ეხება VTB ბანკსაც;
- კანონმდებლობით აიკრძალება რუსული კომპანიებისა და სახელმწიფო უწყებების მიერ ბრიტანული ბაზრიდან ფინანსების მოძიება;
- 100 ინდივიდუალური პირისა და ორგანიზაციის აქტივები გაიყინება;
- რუსულ ავიაკომპანია „აეროფლოტს“ აეკრძალება დიდი ბრიტანეთის ტერიტორიაზე დაშვება;
- შეჩერდება ორმაგი მოქმედების ლიცენზიები ტექნოლოგიებზე, რომელიც შესაძლოა გამოყენებული იქნეს სამხედრო მიზნებისთვის;
- მიმდინარე დღეებში ბრიტანეთი აკრძალავს მაღალი ტექნოლოგიებისა და ნავთობის გადამამუშავებელი მოწყობილობების რუსეთში ექსპორტს;
- რუსეთის მოქალაქეებისთვის დაწესდება ლიმიტი ბრიტანულ საბანკო ანგარიშებზე.
ბორის ჯონსონმა აღნიშნა, რომ არსებობს პოტენციალი, რუსეთი Swift-ის (ფინანსური ტრანზაქციების გლობალური) სისტემიდან გაითიშოს.