ცენტრის შექმნის შესახებ წესდებას საპატრიარქოში ხელი საქართველოს კათოლიკოს-პატრიარქმა ილია მეორემ და ექვსი უმაღლესი სასწავლებლის ხელმძღვანელებმა მოაწერეს.
პატრიარქმა მეცნიერებს ვაზის გასაშენებლად ხაშმი შესთავაზა. რადგან ხაშმი ახლოს არის და აქ წარმოებული ღვინო ერთ-ერთი საუკეთესოა.
ასევე, პატრიარქმა სპეციალისტებს შესთავაზა სტუდენტებისა და მოსწავლეების ამ პროცესში ჩართვა.
“კერძოდ, ხომ არ არის შესაძლებელი, თითოეულ სტუდენტს გამოუყონ ერთ ჰექტრამდე მიწა, სადაც ვაზს გააშენებენ და 5-6 წელი მისი მფლობელები იქნებიან. სტუდენტებს ამით ვაზი შეუყვარდებათ. ადამიანს ვაზის გარდა სხვა რაიმე რომ არ ჰქონდეს ოჯახში, ოჯახი ამით იარსებებს და რჩენა არ გაუჭირდება” – განაცხადა ილია მეორემ.
პატრიარქთან გამართულ შეხვედრაზე ტექნიკური უნივერსიტეტის, საპატრიარქოს ანდრია პირველწოდებულის სახელობის უნივერსიტეტის, ქუთაისის აკაკი წერეთლის სახელობის უნივერსიტეტის, ბათუმისა და თელავის სახელმწიფო უნივერსიტეტებისა და კავკასიის საერთაშორისო უნივერსიტეტის რექტორები იმყოფებოდნენ; ასევე, მევენახეობა-მეღვინეობის დარგში მოღვაწე მეცნიერები.
“მეღვინეობა-მევენახეობის სამეცნიერო ცენტრის დაფუძნების მიზანია, აღნიშნულ უნივერსიტეტებში ხარისხის განათლების უზრუნველსაყოფად საჭირო სამეცნიერო მუშაობის განხორციელება. კერძოდ, მისივე თქმით, აღნიშნული კვლევის ცენტრი მოამზადებს სასწავლო პროგრამებს მეღვინეობა-მევენახეობის დარგში, რომლითაც შემდეგ უნივერსიტეტების სტუდენტებს ასწავლიან და მოამზადებენ. ყველა ჩამოთვლილ უნივერსიტეტს ასევე ექნება ერთი საერთო ბაზა, სამეცნიერო ცენტრი კი არასამეწარმეო იურიდიულ პირად ჩამოყალიბდება” – განაცხადა ტექნიკური უნივერსიტეტის რექტორმა, არჩილ ფრანგიშვილმა.
