კონფერენციას სოფლის მეურნეობის მინისტრის მოადგილეები, დავით გალეგაშვილი, დავით ნატროშვილი, იური ნოზაძე და ღვინის ეროვნული სააგენტოს თავმჯდომარე ლევან დავითაშვილი, ასევე ღვინის მწარმოებელი კომპანიების წარმომადგენლები და დარგის სპეციალისტები ესწრებოდნენ.
კონფერენცია გახსნა ღვინის ეროვნული სააგენტოს თავმჯდომარემ ლევან დავითაშვილმა. ,,არსებული წამოწყება დადებითად წაადგება ქართულ მეღვინეობას. მეღვინეები ხშირად აწყდებიან პრობლემებს ახალი კასრების შეძენისა და ძველის აღდგენა-დამუშავების პროცესში. აქედან გამომდინარე, მნიშვნელოვანია, რომ საქართველოში აღდგება 90-იანი წლების შემდეგ გაუქმებული ღვინის კასრების საწარმო, რომელიც ადგილობრივი კომპანიებისთვის ხელმისაწვდომს გახდის ღვინისა და ალკოჰოლური სასმელებისთვის უახლესი ტექნოლოგიებით წარმოებულ მუხის კასრებს. ეს კი კომპანიებს ხარჯებს მნიშვნელოვნად შეუმცირებს“, – განაცხადა ლევან დავითაშვილმა.
კონფერენციაზე მოხსენებით გამოვიდნენ ესპანეთში ღვინის კასრების მწარმოებელი ერთ-ერთი უმსხვილესი კომპანია ,,ასპას“ წარმომადგენლები. ესპანელმა სპეციალისტებმა დამსწრე საზოგადოებას კომპანიის საქმიანობის შესახებ ინფორმაცია მიაწოდეს და მზადყოფნა გამოთქვეს დაეხმარონ ქართულ მხარეს კასრების წარმოების განვითარების მიმართულებით. კომპანია ,,ასპა“ ბრაზილიის ღვინის კლუბის წევრიცაა და სწორედ მისი დახმარებით ბრაზილიის ბაზარზე შევიდა “თელიანი ველის” პროდუქცია.
ს.ს „პროფესიონალური მეღვინეობის პროდუქტები“ პროექტის ფარგლებში მიღებული სესხით, 90-იანი წლების შემდეგ პირველად, გურჯაანში კასრების წარმოებას დაიწყებს. აღნიშნული საწარმო თებერვალში გაიხსნება.
