თბილისში პირველადი კარკასული ბინების დეფიციტია. კომპანია „ბერუკას“ ბროკერი დავით ბერელიძე „ნეტგაზეთთან“ საუბარში ამბობს, რომ უძრავი ქონების პირველად და მეორად ბაზარზე ძირითადად ეკონომკლასის ბინები იყიდება: „ბინებს ამხანაგობა აშენებს და ჩვენი კომპანია რეალიზაციას უკეთებს. უძრავი ქონების ბაზარზე ცუდი მდგომარეობაა, მოთხოვნა დიდ ფართებზე 2008 წლის შემდეგ დაეცა. ეკონომკლასის ბინები კი სწრაფად იყიდება. კრიზისის გამო კომპანიებმა ახალი მსენებლობები ვეღარ დაიწყეს.“
დავით ბერელიძეს შეფასებით, უძრავ ქონებას ძირითადად საშუალო ფენა ყიდულობს. ტრანზაქციის განხორციელება ნაღდი ანგარიშსწორებით იშვიათად ხდება: „ნაწილი იღებს სესხს ბანკიდან და უძრავ ქონებას ისე ყიდულობს, ნაწილი კი ყიდის კუთვნილ ბინას და საცხოვრებლად უფრო ნაკლებ ფართს ყიდულობს. გაყიდვებიც ძირითადად 40–დან 80 კვადრატულ ბინებზე ფიქსირდება. ბინებს ძირითადად საშუალო ფენა საბანკო კრედიტებით ყიდულობს“.
ბროკერის შეფასებით, 2009 –2011 წლებთან შედარებით 2012 წელს ბაზარი ოდნავ გამოცოცხლებულია, მაგრამ ეს მაინც არ არის ოპტიმიზმის საფუძველი: „კარკასული ბინები ბაზრზე დეფიციტურია. მოთხოვნა ძირითადად პატარა ბინებზე ფიქსირდება“, – ამბობს ბერელიძე.
სამშენებლო კომპანია „კიდ არქიტექტურა“ ბაზარზე 12 წელია, რაც საქმიანობს. კომპანიის გაყიდვების სამსახურის წარმომადგენელი მაია გუჯაბიძე „ნეტგაზეთთან“ ამბობს, რომ პირველადი ბინების ბაზარზე ახალი ტენდენცია შეიმჩნევა: „სამშენებლო კომპანიებმა სტრატეგია შეცვალეს. ახალ მშენებლობებში ბანკის თანამონაწილეობის წილი გაიზარდა. ჩვენი კომპანია ამ დროისათვის ახალ კორპუსს აშენებს. სამშენებლო სამუშაოებს „თიბისი“ბანკი აფინანსებს. შემდეგ დასრულებულ ბინას ბანკი გაყიდის“.
მაია გუჯაბიძე ბაზარზე დანერგილ ახალ სტრატეგიას სამშენებლო სექტორში დაგროვილ პრობლემებს უკავშირებს: „ჩვენი ერთი ობიექტი „ვილა ვაკე“ „ძველი თბილისის ახალი სიცოცხლის“ პროექტის ფარგლებში დავასრულეთ. მშენებლობა იმიტომ გაჭიანურდა, რომ მომხმარებლებმა ბაზრის ვარდნის და ეკონომიკური პრობლემების გამო ფულის გადახდა ვეღარ შეძლეს. ახალი სტრატეგიის შედეგად კი კომპანია კლიენტების შემონატანებზე აღარ იქნება დამოკიდებული. ამიტომ მშენებლობის პროცესში ბანკები ჩაერთვნენ და გასაყიდად უკვე დასრულებულ პროდუქტს გამოიტანენ“.
„კიდ არქიტექტურა“ 1 კვადრატულ თეთრ კარკასს საბურთალოზე 720 –770 დოლარად ყიდის: „დიდი მასშტაბებით ვერ ვაშენებთ. გასაყიდი ბინების ფართი არის 36 კვადრატულიდან 103 კვადრატულამდე. ძირითადად 36, 49 და 56 კვადრატული ფართის ბინები იყიდება“, – ამბობს მაია გუჯაბიძე.
მისი თქმით, პირველად ბინებს ყიდულობს ის სექტორი, რომელიც მუშაობს და აქვს სტაბილური შემოსავალი. ასევე, ვისთვისაც ხელმისაწვდომია ბანკის სესხი.
“გამოიკვეთა კიდევ ერთი ტენდენცია, ბინებს ძირითადად ადგილობრივი მოსახლეობა ყიდულობს. ადრე გაყიდვების ძირითადი წილი უცხოეთში დასაქმებულ ქართველ მოქალაქეებზე მოდიოდა“, – ამბობს „კიდ არქიტექტურის“ გაყიდვების სამსახურის წარმომადგენელი.
სამშენებლო ბაზარს მოთამაშეები ტოვებენ. „ნეტგაზეთს“ სამშენებლო კომპანია „აბრისის“ წარმომადგენლობაში განუცხადეს, რომ კომპანია ბაზრიდან გადის. „სამშენებლო სამუშაოებს ვასრულებთ. ერთი კორპუსი ავაშენეთ ვაჟა–ფშაველაზე. გაყიდულია ყელა ფართი. 1 კვადრატულის ფასი 2008 წელს 470 დოლარი იყო. ბოლოს 1 კვადრატული მეტრი თეთრი კარკასი 600–650 დოლარის ფარგლებში გავყიდეთ. უფინანსობის გამო ვერ ვაგრძელებთ სამშენებლო საქმიანობას, ახალ ინევსტიციებს არ ველოდებით “– აცხადებენ სამშენებლო კომპანიაში.
სამშენებლო ბაზრის კრიზისი იმ კომპანიებზეც აისახა, რომლებიც მოსაპირკეთებელ და სარემონტო სამუშაოებს ახორციელებენ. კომპანია „სფინქსის“ ხელმძღვანელი თეიმურაზ ღარიბაშვილი ამბობს, რომ შეკვეთები შეუმცირდა: „ შენობებს ბუნებრივი ქვით, ბაზალტით, გრანიტით და სხვა საშუალებებით ვაპირკეთებთ. 2008 წლის შემდეგ ჩვენი შეკვეთები შემცირდა. ახალი ნიშა სხვა მოთამაშეებმა დაიკავეს“ – ამბობს ღარიბაშვილი.
თბილისში პირველადი საცხოვრებელი ფართი ყველაზე ძვირი ავლაბარშია, სადაც 1 კვადრატული მეტრი „თეთრი კარკასის“ ფასი 3 000 აშშ დოლარია. ყველაზე იაფი „თეთრი კარკასი“ ისანი–სამგორის რაიონში ღირს და 480 დოლარს უტოლდება.
