ამის შესახებ ხელშეკრულებას ხელი გუშინ, 7 თებერვალს, საღამოს, საქართველოს კულტურისა და ძეგლთა დაცვის სამინისტროში თბილისის ზ.ფალიაშვილის სახელობის ოპერისა და ბალეტის სახელმწიფო თეატრის მმართველმა გიორგი ჟორდანიამ და ფესტივალის ორგანიზატორი კომპანიის, ესტონეთის სახელმწიფო საკონცერტო ორგანიზაციის „Eesti Kontsert“-ის დირექტორმა იური ლეიტენმა მოაწერეს.

ოპერის ფესტივალი საარემაას კუნძულზე პირველად 1999 წელს გაიმართა. წლების განმავლობაში ფესტივალი პარტნიორობს მსოფლიოში ცნობილ ოპერის თეატრებთან; მასში მონაწილეობას იღებენ სახელგანთქმული სოლისტები და დირიჟორები. ყოველწლიურად ღონისძიების სტუმართა რიცხვი იზრდება, გასულ ზაფხულს ფესტივალმა 12,000 სტუმარს უმასპინძლა. 2008 წლიდან ფესტივალის ორგანიზატორია ესტონეთის სახელმწიფო საკონცერტო ორგანიზაცია „Eesti Kontsert“.