ღონისძიების ბოლოს გამოფენა გაიმართა, სადაც წარმოდგენილი იყო საპატრულო პოლიციის ყოველდღიური მუშაობის ამსახველი ფოტომასალა და ვიდეორგოლები. სტუმრებს ასევე გააცნეს ის ცვლილებები და სიახლეები, რაც საპატრულო პოლიციის დეპარტამენტში ბოლო ორი წლის განმავლობაში განხორციელდა.
შსს-ს პრესსამსახურის განმარტებით, საპატრულო პოლიციას “ფორდის” მარკის 160 ახალი ავტომობილი ეყოლება, რომელიც სპეციალურად პოლიციის საქმიანობაზეა მორგებული. მანქანაში მონტაჟდება ყველა ის საშუალება, რაც პატრულის თანამშრომელს ესაჭიროება – მონიტორი, ალკოტესტი და ავტომატი. ამასთან, მანქანის უკანა კარი შიგნიდან არ იღება, რაც დაკავებული პირის მხრიდან მანქანის დატოვების ალბათობას ამცირებს. როგორც ნეტგაზეთს თბილისში სტუმრად მყოფმა “ფორდის” წარმომადგენელმა ვიქტორ მონემ განუცხადა, ერთი ავტომობილის ღირებულება საჭირო აღჭურვილობის ჩათვლით 29 ათასი აშშ დოლარია. გამოდის, რომ სულ 160 ავტომობილი თავისი აღჭურვილობით 4 640 000 აშშ დოლარი დაჯდა. შსს-ს პრესსამსახურში ნეტგაზეთის უთხრეს, რომ ძველი საპატრულო ავტომობილები, რომლებიც ახალი “ფორდებით” ჩანაცვლდება, არ ჩამოიწერება და არ გაიყიდება. შსს-ს ცნობით, ეს მანქანები საჭიროებისამებრ უწყების სხვადასხვა სტრუქტურებში გადანაწილდება. ახალი ავტომობილები პირველ ეტაპზე მხოლოდ თბილისსა და ავტომაგისტრალებზე იმოძრავებს.
შსს-ში მოწყობილ გამოფენაზე 2004-2014 წლებში საპატრული ეკიპაჟების ჩაცმულობის და აღჭურვილობის განვითარების დინამიკაც წარმოადგინეს.
როგორც შსს-ში განგვიმარტეს, ქალაქებში მოძრავი საპატრულო ეკიპაჟები M4-ის ტიპის შაშხანებს არ გამოიყენებენ და მათ აღჭურვილობაში ლეონარდოს ფირმის ვინჩესტერის ტიპის შაშხანა შევა.
გამოფენა. შს მინისტრ ალექსანდრე ჭიკაიძესთან ერთად, დაათვალიერა საქართველოს პრემიერმა ირაკლი ღარიბაშვილმა.