პროკურატურის განცხადება დოკუმენტების ამოღებაზე ეხება 2008 წლის საბანკო ოპერაციას – TBC

“თიბისი ბანკი” პასუხობს პროკურატურის 8 იანვრის განცხადებას, რომლის მიხედვითაც, საგამოძიებო უწყებამ ბანკიდან მიმდინარე გამოძიების ფარგლებში დოკუმენტაცია ამოიღო.

“რაც შეეხება პროკურატურის მიერ გაკეთებულ კომენტარს დოკუმენტების ამოღებასთან დაკავშირებით, საკითხი ეხება 2008 წლის რიგით, კანონიერ საბანკო ოპერაციას, რომელიც:

  • არაერთხელ იქნა სახელმწიფო სტრუქტურების და ეროვნული ბანკის მიერ შესაბამის პერიოდებში შემოწმებული როგორც მოქმედი, ისე წინა ხელისფულების დროს;
  • არაერთხელ იქნა საერთაშორისო აუდიტორების მიერ შემოწმებული და მათი სისწორე დადასტურებული;
  • ამასთან, მოცემული ტრანზაქცია ხანდაზმულია.
  • 8 იანვარს, გვიან საღამოს, რამოდენიმე მედიაპორტალმა, გაავრცელა მცდარი და მიზანმიმართულად დამახინჯებული ინფორმაცია, რომელიც ემსახურება ქვეყნის წამყავნი ფინანსური ინსტიტუტისა და მისი დამფუძნებლების რეპუტაციის შელახვას” – აცხადებს “თიბისი ბანკი”.

“თიბისი ბანკი” ასევე პასუხობს მედიასაშუალებების ნაწილის მიერ გავრცელებუილ ინფორმაციას ბანკის მენეჯერების შესაძლოს უკანონო ქმედებებთან დაკავშირებით და განმარტავს:

“ცხადია, რომ ამ ინფორმაციის გამავრცელებლების მიზანია ზიანი მიაყენოს ქვეყნისთვის უმნიშვნელოვანეს ინსტიტუტს – “თიბისი ბანკს” – ადგილობრივ და საერთაშორისო დონეზე.

აღნიშნულთან დაკავშირებით გვინდა განვაცხადოთ, რომ კატეგორიულად უარვყოფთ ამ ორკესტრირებული შავი პიარის ავტორების მიერ შეთითხნილ ბრალდებებსა და შეგნებულად დამახინჯებულ ფაქტებს. “თიბისი ბანკი” არის და დარჩება ქვეყანაში და რეგიონში ლიდერ ფინანსურ ინსტიტუტად, რომელიც წარმოდგენს კორპორაციული მართვისა და პასუხისმგებლობის საუკეთესო მაგალითს, რაც აღიარებულია საერთაშორისო ინსტიტუციების და ინვესტორების მიერ”.

“თიბისი ბანკის” განცხადებით, ის არის ლონდონის საფონდო ბირჟაზე განთავსებული “მოწინავე საჯარო კომპანია, რომელიც წარმოდგენილია პრემიუმ სეგმენტში (FTSE250 სიაში) და წარმოადგენს მსოფლიოს ხუთივე კონტინენტის ინვესტორთა და აქციონერთა ინტერესებს საქართველოში. სამწუხაროა ის ფაქტი, რომ თიბისი ბანკის არსებობის 27 წლის განმავლობაში, ყველა პოლიტიკური მმართველობის პერიოდში, არაერთხელ ყოფილა თავდასხმის ობიექტი. თიბისი ბანკს და მის მენეჯმენტს გამოუვლია არაერთი კრიზისი და ყველა ხელისუფლების პირობებში ყოველთვის დაუმტკიცებია და მომავალშიც დაამტკიცებს თავის სიმართლეს”.

“თიბისი ბანკი” ასევე აცხადებს, რომ ვერ შეეგუება მიზანმიმართული დისკრედიტაციისა და რეპუტაციის შელახვის მცდელობას, ვისგანაც არ უნდა მომდინარეობდეს ის, და საჭიროების შემთხვევაში გამოიყენებს მის ხელთ არსებულ ყველა ადგილობრივ და საერთაშორისო სამართლებრივ ბერკეტს თიბისი ბანკის, მისი დამფუძნებლებისა და საერთაშორისო აქციონერების კანონიერი ინტერესების დასაცავად.

პროკურატურამ 8 იანვარს ბანკიდან მხოლოდ დოკუმენტების ამოღების ფაქტი დაადასტურა, თუმცა არ განუმარტავს, კონკრეტულად რომელ საქმეს უკავშირდებოდა აღნიშნული გამოძიება.

ნეტგაზეთის მასალების სხვა გამოცემებში გადაბეჭდვის წესი


ავტორი
თაზო კუპრეიშვილი არის "ნეტგაზეთის" რედაქტორი 2018 წლის პირველი თებერვლიდან.