საქართველოში ფიქსირებული ინტერნეტის აბონენტების რაოდენობამ 2010 წლის ბოლოს 300’050 შეადგინა.
ამ ინფორმაციას კომუნიკაციების ეროვნული კომისია აქვეყნებს. თავის ანგარიშში კომისია განმარტავს, რომ აბონენტში იგულისხმება პირი, რომელსაც კვარტალის ბოლო თვეს გაეწია ინტერნეტ-მომსახურება. ინტერნეტ-წვდომის ერთი წერტილით რამდენიმე მომხმარებელიც რომ სარგებლობდეს, იგულისხმება, რომ აბონენტი არის ერთი.
შესაბამისად, თუ გავითვალისწინებთ იმას, რომ ერთი აბონენტი საქართველოში უმეტესწილად უზიარებს თავის მეზობელს ინტერნეტს, სავარაუდოდ, რეალური ციფრი ფიქსირებული ინტერნეტის მომხმარებლებისა ბევრად მეტი იყო 2010 წელს, ვიდრე 300 ათას 50.
კომუნიკაციების კომისია მიუთითებს ფიქსირებული ინტერნეტის მომხმარებლების მატების ტენდენციებზე. კერძოდ, 2010 წლის მეოთხე კვარტალში აბონენტების რაოდენობა პირველ კვარტალთან შედარებით 26%-ით (62,000 მომხმარებლით) გაიზარდა.
ინტერნეტის აბონენტების რაოდენობით კომპანია სილქნეტი ლიდერობს, რომელიც ბაზრის 42.6%.
ფიქსირებული ინტერნეტის აბონენტების 94 %-ს ფიზიკური პირები შეადგენენ.
ტექნოლოგიები
ინტერნეტის მომხმარებლამდე მიწოდების ძირითად საშუალებად სადენიანი, კერძოდ – DSL (55.8 %) და ოპტიკურ-ბოჭკოვანი (28.7 %) ტექნოლოგიები გამოიყენება. უსადენო ინტერნეტის აბონენტები ძირითადად EVDO და CDMA ტექნოლოგიებით სარგებლობენ.
2010 წლის ბოლო კვარტალში შესამჩნევად მოიმატა DSL და ოპტიკურ-ბოჭკოვანი ტექნოლოგიით მოსარგებლე ინტერნეტის აბონენტების რაოდენობამ. EVDO აბონენტების რაოდენობამ გაუსწრო CDMA აბონენტების რაოდენობას.
ინტერნეტის აბონენტების 90% საქართველოს დიდ ქალაქებზე მოდის. ინტერნეტის მომხმარებლამდე მიწოდების ოპტიკურ-ბოჭკოვანი ტექნოლოგია პრაქტიკულად მხოლოდ თბილისში და მცირე რაოდენობით რუსთავში გვხვდება.
შემოსავალი
ინტერნეტ–კომუნიკაციებიდან მიღებულმა შემოსავალმა 2010 წელს 80.2 მლნ ლარი შეადგინა. შემოსავლის თვალსაზრისით 2010 წლის ბოლო კვარტალში საბაზრო წილის 80%-ს სილქნეტი (39.9 %) და კავკასუს ონლაინი (39.6 %) ფლობდნენ.
ერთი აბონენტისგან მიღებული საშუალო შემოსავალი (ARPU) 2010 წლის განმავლობაში 25.1 ლარიდან 22.2 ლარამდე შემცირდა.
გავრცელებულ ტექნოლოგიებში ყველაზე მეტი ერთი აბონენტისგან მიღებული საშუალო შემოსავალი (ARPU) Wi-Max ტექნოლოგიას აქვს, ყველაზე მცირე – CDMA-ს