“კავკაზსკი უზელის” ცნობით, აქციის 15-მდე მონაწილე, რომლებიც პოლიტპატიმრების მხარდასაჭერად სომხეთის მთავრობის შენობის კიბეებზე ისხდნენ და ვარდგეს გასპარის გათავისუფლებას ითხოვდნენ, პოლიციამ ადგილიდან გააძევა, 6 მათგანი კი დაკავებულია.

აქტივისტები სკანდირებდნენ: “თავისუფლება ვარდგეს გასპარს და ყველა პოლიტპატიმარს”,” თავისუფლება დამოუკიდებელ სომხეთს”, რის შემდეგაც პოლიციამ მათ ტერიტორიის დატოვება მოსთხოვა, რადგან მათი განმარტებით, აქტივისტების ქმედება უკანონოა.

6 დაკავებული კენტრონის პოლიციის განყოფილებაში გადაიყვანეს. გამოცემის ცნობით, ისინი პოლიციელებისადმი დაუმორჩილებლობის გამო დააკავეს.

“კანონის მიხედვით საპროტესტო აქცია სამთავრბო შენობებთან გონივრული დაშორებით უნდა ჩატარდეს”,-განუცხადა “კავკაზსკი უზელს” ერევნის პოლიციის უფროსის მოადგილემ ვალერი ოსიპიანმა.

გამოცემის ინფორმაციით, 25 თებერვალს პრეზიდენტის რეზიდენციის წინ აქციის 4 მონაწილე დააკავეს, თუმცა, პოლიციის ცნობით, დაკავებულთა რაოდენობა სამი იყო. აქციის მონაწილეებმა ბაგრამიანის პროსპექტის გადაკეტვა სცადეს, მაგრამ პოლიციამ ამის საშუალება არ მისცა.