აზერბაიჯანში, ქალაქ სიაზანში 13 იანვარს პოლიციასა და აქციის მონაწილეებს შორის მომხდარი დაპირისპირებისას 5 პოლიციელი და 3 დემონსტრანტი დაშავდა ამის შესახებ haqqin.az– სიაზანის რაიონულ პოლიციაში განუცხადეს.
პოლიციის ცნობით, საზოგადოებრივი წესრიგის აღდგენისას სამართალდამცველებმა აქციის 55 მონაწილე დააკავეს.
13 იანვარს პოლიცია და აქციის მონაწილეები სიაზანში ერთმანეთს დაუპირისპირდნენ. დემონსტრანტები ფასებისა და უმუშევრობის ზრდას აპროტესტებდნენ. “კავკაზსკი უზელის” ინფორმაციით, დემონსტრანტების წინააღმდეგ ცრემლსადენი გაზი და რეზინის ტყვიები გამოიყენეს.
აქცია ფასების ზრდასთან დაკავშირებით 12 იანვარსაც გაიმართა ქალაქ ლიმანში, სადაც 100-მდე ადამიანი შეიკრიბა. მომიტინგეებმა ასტარა-ბაქოს ტრასა გადაკეტეს, მაგრამ ოფიციალურ პირებთან შეხვედრის შემდეგ დაიშალნენ. აქციაში მონაწილეობის გამო პარტია “აზერბაიჯანის ეროვნული ფრონტის” ფილიალის ხელმძღვანელი ნაზიმ ჰასანილი და პარტია “მუსავატის” აქტივისტი იმან ალიევა დააკავეს. სასამართლომ დაკავებულებს 30-დღიანი ადმინისტრაციული პატიმრობა მიუსაჯა.
