პარლამენტის თავმჯდომარემ შალვა პაპუაშვილმა ევროკავშირის წევრი ქვეყნების პარლამენტარებისგან შემდგარ დელეგაციას შეხვედრაზე უარი უთხრა.
კერძოდ, თბილისში იმყოფება ევროკავშირის 8 ქვეყნის საგარეო ურთიერთობათა კომიტეტების თავმჯდომარეთა დელეგაცია.
როგორც პაპუაშვილი ამბობს, „ამ ჯგუფმა“ მასთან და პარლამენტის ზოგიერთი კომიტეტის თავმჯდომარესთან შეხვედრა ითხოვა, რაზეც უარი უთხრა და მიზეზი წერილობითაც განუმარტა. აღნიშნულ წერილს პაპუაშვილი Facebook-ზე ავრცელებს.
უარის ერთ-ერთ მიზეზად პაპუაშვილი ასახელებს დელეგაციაში შემავალი რამდენიმე ევროპელ პოლიტიკოსის, მათ შორის ლიეტუვის სეიმის საგარეო ურთიერთობათა კომიტეტის თავმჯდომარის, ჟიგიმანტას პავილიონისს კრიტიკულ განწყობას „ქართული ოცნების“ ხელისუფლებისადმი.
პაპუაშვილი მათ არამეგობრულ დამოკიდებულებასა და საქართველოს არჩევნებში ჩარევაში ადანაშაულებს.
„არ გამკვირვებია ევროკავშირის რამდენიმე ქვეყნის პარლამენტის წევრისგან შემდგარი დელეგაციის საქართველოში ჩამოსვლა. თუმცა, ნამდვილად გამაკვირვა დელეგაციის ზოგიერთი წევრის განზრახვამ, შეხვდნენ საქართველოს პოლიტიკურ და საპარლამენტო ხელმძღვანელობას, მიუხედავად მათ მიერ საქართველოს ხელისუფლების და ქართული საზოგადოების მიმართ მრავალჯერ გამოვლენილი პირადი არამეგობრული დამოკიდებულებისა.
მიუხედავად იმისა, რომ საქართველოს ხელისუფლება რჩება ევროკავშირის ყველა რელევანტურ და დაინტერესებულ მხარესთან დიალოგის ხელშეწყობის ერთგული, შეხვედრების გამართვის ამ განზრახვას დადებითად ვერ ვუპასუხებ.
საქართველოსადმი მრავალჯერ გამოვლენილი არამეგობრული დამოკიდებულებიდან გამომდინარე, დელეგაციის ზოგიერთ წევრს სხვა მოლოდინი არც უნდა ჰქონოდა. აშკარაა, რომ ვიზიტის მთავარი საფუძველი პოლიტიკური მიკერძოებულობაა და ამას ყველა ხედავს.
წინასაარჩევნო კამპანიის დროს, დელეგაციის ზოგიერთი წევრი და სხვა უცხოელი პოლიტიკოსები მუდმივად და მიზანმიმართულად არღვევდნენ საქართველოს კანონმდებლობას საქართველოს მმართველი პარტიის წინააღმდეგ მიმართული საჯარო კამპანიის წარმართვისა და ოპოზიციის მხარდაჭერის გზით, რითაც მოქალაქეების ნებაზე უკანონო ზემოქმედებას ცდილობდნენ“, – წერს პაპუაშვილი.
როგორც პაპუაშვილი აცხადებს, აღნიშნულის გათვალისწინებით, შეუძლებლად მიაჩნია დელეგაციის მხრიდან შეხვედრის შესახებ მიღებულ თხოვნაზე დათანხმება.
„ამავდროულად, მსურს გამოვხატო პატივისცემა დელეგაციის სხვა წევრების მიმართ და დავუდასტურო დიალოგის გაგრძელების მზაობა საპარლამენტო დიპლომატიის ფუნდამენტური პრინციპებისა და ნორმების ფარგლებში, თანასწორობისა და სუვერენიტეტის პატივისცემის საფუძველზე“, – წერს პაპუაშვილი.
ამასთან, დელეგაციაში შემავალმა ერთ-ერთმა პოლიტიკოსმა, გერმანიის ბუნდესტაგის საგარეო ურთიერთობათა კომიტეტის თავმჯდომარე მიხაელ როთმა X-ზე დაწერა, რომ მმართველი პარტიიდან შეხვედრაზე მათ არავინ დათანხმდა, მათ შორის არც მთავრობიდან.
საქართველოში ჩამოსულები არიან შემდეგი ქვეყნების საგარეო ურთიერთობათა კომიტეტების თავმჯდომარეები:
- გერმანიის,
- ფინეთის,
- შვედეთის,
- საფრანგეთის,
- ლიეტუვის,
- ლატვიის,
- ესტონეთის,
- პოლონეთის.
