მუსიკალური პროექტი Soap&Skin რუსთაველის თეატრის სცენაზე

რუსთაველის თეატრის ალისფრად განათებულ ფოიესთან მსმენელმა შეკრება კონცერტამდე რამდენიმე საათით ადრე დაიწყო. ეს ის შემთხვევაა, როდესაც შემსრულებელს მხოლოდ ახალგაზრდები არ ელოდებოდნენ. მოსაცდელში შუახნის წყვილებსაც შეამჩნევდით.

ავსტრიული მუსიკალური ექსპერიმენტული პროექტი Soap&Skin თბილისს უკვე მეორედ ეწვია. 25 წლის მუსიკოსის, ანია პლაშგის პროექტს ქართველი მსმენელი პირველად Tbilisi Open Air 2015-ზე გაეცნო და განსაკუთებული მოწონებაც დაიმსახურა. Björk-ითა და სერგეი რახმანინოვით შთაგონებულმა, სადებიუტო ალბომი Lovetune for Vacuum 2009 წელს გამოუშვა და მალევე მოხვდა ავსტრიის, გერმანიისა და საფრანგეთის მუსიკალურ ჩარტებში.

რუსთაველის თეატრის სცენაზე Soap&Skin-მა ცნობილ კომპოზიციებთან ერთად ახალი სიმღერებიც შეასრულა. მუსიკასთან ერთად შემსრულებელმა მაყურებელს თავი საინტერესო ვიზუალური გაფორმებითაც დაამახსოვრა.

Soap&Skin თბილისში ახალი პროექტის, “მუზამეს” მოწვევით ჩამოვიდა. როგორც “მუზამეს” იდეის ავტორები ამბობენ, მათი მიზანია თანამედროვე მუსიკის მოყვარულებს განსხვავებული მუსიკალური ლაივები შესთავაზონ და ვიზუალური, სასცენო და მუსიკალური ხელოვნება გააერთიანონ. “მუზამე” ამ ეტაპზე ექსპერიმენტული პროექტია, რომელიც ყოველ ჯერზე გეგმავს ითანამშრომლოს ორიგინალური იდეების მქონე უცხოელ და ქართველ ახალგაზრდა ხელოვანებთან.

“ვთვლით, რომ ყველაფერი, რასაც პირველ პროექტზე ვაპირებდით, შესრულდა – განსხვავებული ჯადოსნური გარემო, ჯადოსნური მუსიკა და პერფორმანსი, პუბლიკის ემოციები და თვითონ ანიას დამოკიდებულება – ძალიან დიდი ემოციებითა და შთაბეჭდილებებით დატოვა თბილისი. “მუზამეს” მთავარი იდეაც სწორედ ესაა – გამოვიყენოთ მუსიკა მედიუმად – ჯადოსნური და სიურრეალისტური ემოციებისა და ფიქრების მიღება – გაზიარებისთვის,” – ამბობს პროექტის ავტორი გიორგი კიკონიშვილი.

რაც შეეხება მომავალ გეგმებს, “მუზამე” უკვე აწარმოებს მოლაპარაკებებს სხვა არტისტებთან.