საჯარო რეესტრი დოკუმენტებს ბრაილის შრიფტითაც გასცემს

იუსტიციის სამინისტროს საჯარო რეესტრის ეროვნული სააგენტო ახალ პროექტს იწყებს. პროექტი ”თანაბარი შესაძლებლობები ყველასათვის” სააგენტოს სერვისების ხელმისაწვდომობის უზრუნველყოფას გულისხმობს.

საჯარო რეესტრის ცნობით, პროექტის განხორციელების შედეგად, უსინათლო და მცირემხედველობის მქონე პირებისთვის საჯარო რეესტრის მიერ მომზადებული ყველა სახის წერილობითი დოკუმენტი, მოთხოვნის შემთხვევაში, ბრაილის შრიფტით გაიცემა. გარდა ამისა, მათი ინფორმაციით, გათვალისწინებულია საჯარო რეესტრის ვებგვერდის ხელმისაწვდომობა შესაბამისი ხმოვანი პროგრამის გამოყენებით, რითაც მხედველობის პრობლემის მქონე პირები ელექტრონული სერვისების მიღებას და ინფორმაციის გაცნობას მარტივად შეძლებენ.

”უკვე წლებია სააგენტო შეზღუდული შესაძლებლობების მქონე პირთა დასაქმებისა და მათი საზოგადოებაში ინტეგრაციის კუთხით აქტიურად მუშაობს. ჩვენთვის ეს სოციალური პასუხისმგებლობის მიმართულების მნიშვნელოვანი ნაწილია. ამჯერად გადავწყვიტეთ ყურადღება საჯარო რეესტრის სერვისებით სარგებლობის თანაბარი შესაძლებლობების უზრუნველყოფაზე გაგვეკეთებინა. პროექტის განხორციელებით ჩვენ შევასრულებთ გაეროს შეზღუდული შესაძლებლობის მქონე პირთა უფლებების კონვენციით დაცულ პრინციპს „გონივრულ მისადაგებაზე“, რაც გულისხმობს მოთხოვნას ინფორმაციის ხელმისაწვდომობის შესახებ, რომლის მიხედვით სახელმწიფოებმა დაყოვნებისა და დამატებითი ხარჯების გარეშე უნდა უზრუნველყონ ფართო საზოგადოებისათვის განკუთვნილი ინფორმაციის შშმპ-ისთვის მიწოდება მათთვის გასაგები ფორმით და სხვადასხვა სახის შესაძლებლობის შეზღუდვაზე მორგებული ტექნოლოგიების გამოყენებით,” – აცხადებს საჯარო რეესტრის თავმჯდომარე პაპუნა უგრეხელიძე.

როგორც იუსტიციის სამინისტროში ამბობენ, საჯარო რეესტრის ეროვნული სააგენტო იქნება პირველი ადმინისტრაციული ორგანო არა მარტო საქართველოში, არამედ პოსტსაბჭოთა ქვეყნებში, რომელიც ამ მიმართულეთ იმუშავებს.

საჯარო რეესტრის ინფორმაციით, ბრაილის შრიფტით დოკუმენტების გაცემა 2016 წლის მარტიდან თბილისის იუსტიციის სახლში დაიწყება, წლის ბოლომდე კი ამ სერვისით სარგებლობა ნებისმიერ ქალაქსა და რაიონში იქნება შესაძლებელი.

ნეტგაზეთის მასალების სხვა გამოცემებში გადაბეჭდვის წესი
ავტორი
გიორგი დიასამიძე არის ნეტგაზეთის რეპორტიორი 2014 წლიდან. აშუქებს საზოგადოებრივ-პოლიტიკურ თემებს, სპორტს და სხვა მიმდინარე მოვლენებს. ასევე, მუშაობს განათლების, ადამიანის უფლებებისა და სოციალურ საკითხებზე.