ორმა ოპოზიციურმა პარტიამ, რომლებიც 2025 წლის თვითმმართველობის არჩევნებს ბოიკოტს უცხადებენ, დაკარგეს საარჩევნო ნომრები.
#5 ერთიანი ნაციონალური მოძრაობის საარჩევნო ნომერი იყო ორი ათეული წელი – ამჯერად ამ ნომრით არჩევნებში მონაწილეობას მიიღებს პარტია „ჩვენი გაერთიანებული საქართველო“, ხოლო “კოალიცია ცვლილებებისთვის” საარჩევნო ნომერი 4 ერგო პარტიას “ქართველი ერთობა”.
ერთიანმა ნაციონალურმა მოძრაობამ და “კოალიცია ცვლილებებისთვის” მიმართეს ცესკოს რიგითი ნომრების გამოყენებაზე, თუმცა არ მიუმართავთ არჩევნებში მონაწილეობაზე, ამიტომაც ცესკომ მათი საარჩევნო ნომრები წილისწყრაში გაათამაშა.
ცესკოს ცნობით, 4 ოქტომბრის არჩევნებში მონაწილეობის მიზნით ცესკოს 17-მა პოლიტიკურმა გაერთიანებამ მომართა.
“17 პოლიტიკური გაერთიანებიდან 5 პოლიტიკურ გაერთიანებას საარჩევნო კანონმდებლობის შესაბამისად, სათანადო პროცედურის დაცვით, ჰქონდა რიგითი ნომრის შენარჩუნების უფლებამოსილება, ხოლო 12 პოლიტიკურ გაერთიანებას რიგითი ნომერი მიენიჭა წილისყრით.
კანონმდებლობის თანახმად, 4 ოქტომბრის არჩევნებისთვის რიგითი ნომრის შენარჩუნება დაკავშირებული იყო რამდენიმე ფაქტორზე. მათ შორის, პოლიტიკურ გაერთიანებას უნდა ჰქონოდა შესაბამისი უფლებამოსილება; ნომრის შენარჩუნებასთან დაკავშირებით განცხადებით უნდა მიემართა საარჩევნო ადმინისტრაციისთვის არაუგვიანეს 17 ივლისისა და ასევე უნდა მიემართა საქართველოს ცენტრალური კომისიის თავმჯდომარისთვის არჩევნებში მონაწილეობის მიზნით არაუგვიანეს 8 აგვისტოს 18:00 საათისა. ამგვარი უფლებამოსილება 7 პოლიტიკურ გაერთიანებას ჰქონდა, თუმცა, მათგან ორმა ცესკოს თავმჯდომარეს არჩევნებში მონაწილეობის მიზნით რეგისტრაციისთვის არ მიმართა. შესაბამისად, რიგითი ნომერი შეუნარჩუნდა მხოლოდ 5 პოლიტიკურ გაერთიანებას, დანარჩენებს კი მიენიჭათ წილისყრით”, – აცხადებს ცესკოს.
ცესკოს განმარტებით, წილისყრით საარჩევნო სუბიექტებს განესაზღვრათ შემდეგი რიგითი ნომრები:
№1 – „მამული, ენა, სარწმუნოება“
№2 – „დემოკრატთა ალიანსი“
№3 – „კონსერვატორები საქართველოსთვის“
№4 – ქართველ ერთობა
№5 – „ჩვენი გაერთიანებული საქართველო“
№6 – „მესამე გზა“
№7 – „თავისუფალი საქართველო“
№8 – „საქართველოს პატრიოტთა ალიანსი“
№9 – ძლიერი საქართველო-ლელო
№10 – „მემარცხენე ალიანსი“
№11 – „საქართველო“
№12 – მწვანეთა პარტია
№13 – „საქართველოს ერთობისა და განვითარების პარტია“
№14 – „სახალხო ხელისუფლება“
№25 – „გახარია საქართველოსთვის“
№36 – გირჩი
№41 – ქართული ოცნება
- “ოცნება” 2025 წლის 4 ოქტომბერს ადგილობრივი თვითმმართველობის არჩევნებს მართავს. ამ არჩევნებს ბოიკოტს უცხადებს ოპოზიციური პარტიების ნაწილი, რომლებიც პარლამენტს არალეგიტიმურად მიიჩნევენ. თუმცა უთანხოებაა ოპოზიციაში იმის გამო, რომ “გახარია საქართველოსათვის” და პარტია “ლელო” არჩევნებში მონაწილეობენ.
- საქართველოს მოქალაქეების ნაწილი 240- ზე მეტი დღეა ითხოვენ ხელახალ საპარლამენტო არჩევნებს.