2025 წლის 2 ივნისს ეჩმიაძინში, სრულიად სომეხთა კათოლიკოსის, გარეგინ II-ის თავმჯდომარეობით, გაიმართა უმაღლესი სულიერი საბჭოს სხდომა, რომელშიც მონაწილეობდნენ ეპისკოპოსები და ეპარქიების ხელმძღვანელები როგორც სომხეთიდან, ისე დიასპორიდან.
როგორც NEWS.am წერს, სხდომაზე განიხილეს “სირთულეები, რაც დღეს ქვეყნის წინაშე დგას, საეკლესიო-საერო ურთიერთობები, ასევე საზოგადოებისთვის მნიშვნელოვანი რამდენიმე საკითხი”.
“განსაკუთრებული ყურადღება დაეთმო იმ სამარცხვინო ანტიეკლესიურ კამპანიას, რომელიც ბოლო დღეებში პრემიერ-მინისტრმა, ნიკოლ ფაშინიანმა წამოიწყო”, – წერს გამოცემა საბჭოს პრესრელიზზე დაყრდნობით.
ამასთან დაკავშირებით, გამოცემის ცნობითვე, უმაღლესმა სულიერმა საბჭომ გააკეთა განცხადება, რომელშიც ნათქვამია:
„სომხეთის პრემიერ-მინისტრმა დაიწყო მორიგი კამპანია სომხეთის სამოციქულო წმინდა ეკლესიის წინააღმდეგ ისეთ ლექსიკასა და ბრალდებებზე დაყრდნობით, რაც შეუფერებელია სახელმწიფო მოღვაწისთვის. გამოქვეყნებული მასალები, რომლებიც სავსეა უწმაწური სიტყვებით, ეწინააღმდეგება ელემენტარულ ზრდილობის ნორმებს, არღვევს ადამიანის ფუნდამენტურ უფლებებს და უხეშად შეურაცხყოფს მორწმუნეთა რელიგიურ გრძნობებს.
ამგვარი დამოკიდებულება აშკარად არის პოლიტიკურად მოტივირებული და მიზნად ისახავს სომხეთის ეკლესიისა და მის სულიერ მოღვაწეთა ავტორიტეტის შერყევას. ეს კამპანია ცდილობს ეკლესიის ხმის ჩახშობას და მისი საზოგადოებრივი გავლენის შემცირებას. პრემიერ-მინისტრის ანტიეკლესიური ქცევა და ეკლესიისა და ეროვნული ღირებულებების წინააღმდეგ წამოწყებული პროცესები სერიოზულ საფრთხეს უქმნის სომხურ სახელმწიფოებრიობას და ჩვენი ხალხის ერთობას – როგორც სამშობლოში, ასევე დიასპორაში.
მოვუწოდებთ ჩვენი წმინდა ეკლესიის მორწმუნეებს, გაერთიანდნენ და არ დაუშვან ეროვნული საძირკვლის რყევა”.
იქამდე ფაშინიანის „სამოქალაქო შეთანხმების“ ფრაქციამ ეკლესიის ფინანსური ანგარიშვალდებულების აუცილებლობაზე ისაუბრა და განაცხადა, რომ აპირებს კანონპროექტის ინიცირებას, რომლის მიხედვითაც სომხეთის ეკლესია სახელმწიფოს წინაშე ფინანსურად ანგარიშვალდებული უნდა გახდეს. ამის შესახებ ფრაქციის მდივანმა არტურ ჰოვანნისიანმა ფეისბუკზე დაწერა.
„შაბათსა და კვირას ჩემს ფეისბუკ გვერდზე დავდე მცირე გამოკითხვა კითხვით: უნდა იყოს თუ არა სომხეთის სამოციქულო ეკლესია ფინანსურად ანგარიშვალდებული სახელმწიფოს წინაშე? მონაწილეობა მიიღო 2 679-მა ადამიანმა: კი – 96% (2 575 ადამიანი), არა – 4% (104). საჭიროა ამ მიმართულებით საკანონმდებლო მუშაობა“, – დაწერა ჰოვანნისიანმა.
მანამდე ნიკოლ ფაშინიანმა თქვა, რომ “ჯერ კიდევ დასადგენია, რამდენ მღვდელს ჰყავს ოჯახი, ვინც ცელიბატს უნდა იცავდეს (დაუქორწინებლობის/უბიწოების აღთქმა) . ასევე განაცხადა, რომ სომხეთის კათოლიკოსის არჩევისას სახელმწიფოს უნდა ჰქონდეს გადამწყვეტი სიტყვა.
სომხეთის პრემიერ-მინისტრსა და ეკლესიას შორის დაძაბულობა განსაკუთრებით გამწვავდა ბოლო წლებში, განსაკუთრებით მას შემდეგ, რაც 2020 წელს ეჩმიაძინმა (საეკლესიო მმართველმა ორგანომ) პრემიერის გადადგომა მოითხოვა და მკაცრად გააკრიტიკა მთიან ყარაბაღთან დაკავშირებული პოლიტიკის გამო.