ახალი ამბები

„ოცნებაში“ არის მზაობა, რომ აშშ-ის დამოკიდებულებები შეიძლება არ შეიცვალოს – ყაველაშვილის მრჩეველი

3 აპრილი, 2025 •
„ოცნებაში“ არის მზაობა, რომ აშშ-ის დამოკიდებულებები შეიძლება არ შეიცვალოს – ყაველაშვილის მრჩეველი

„ქართული ოცნების“ პრეზიდენტის, მიხეილ ყაველაშვილის მრჩევლის, ლუკა ეხვაიას განცხადებით, „ქართული ოცნების“ რიტორიკა მიუთითებს, რომ მაინცდამაინც აღარ აქვთ მოლოდინი, რომ მათდამი აშშ-ის პოლიტიკა შეიცვლება.

ლუკა ეხვაია მიხეილ ყაველაშვილის მრჩეველი არის საერთაშორისო ურთიერთობების საკითხებში. ის სტუმრად იმყოფებოდა „42-ე პარალელის“ პოდკასტში, სადაც აშშ-ისა და საქართველოს ურთიერთობებზეც ისაუბრა.

„ქართული ოცნების“ ხელისუფლება, რომელსაც აშშ-ის წინა ადმინისტრაციასთან ურთიერთობა დაეძაბა რუსული კანონის მიღების გამო, რაც აშშ-ის მხრიდან სტრატეგიული პარტნიორობის შეჩერებასა და ქართველი მაღალჩინოსნების, მათ შორის მმართველი პარტიის საპატიო თავმჯდომარის, ბიძინა ივანიშვილის დასანქცირებაშიც გამოიხატა, ირწმუნებოდა, რომ დონალდ ტრამპის ინაუგურაციისთანავე ყველაფერი შეიცვლებოდა.

თუმცა, ლუკა ეხვაიას თქმით, ტრამპის ინაუგურაციის შემდეგ „ქართული ოცნების“ განცხადებები, რომლის მიხედვითაც აშშ-თან ურთიერთობის ნორმალიზების თარიღი შეიცვალა და იმაზე გახდა დამოკიდებული, დაამარცხებს თუ არა ტრამპი „დიფ სტეიტს“, მიუთითებს, რომ სახელისუფლებო პარტიას მაინცდამაინც ოპტიმისტური მოლოდინი არ აქვს.

„მე მგონია, რომ „ოცნება“ რასაც აკეთებს, ეს არ არის ის, რომ მაინცდამაინც ოპტიმისტური და იდეალისტური მოლოდინები შეიქმნას და ფსონი გაკეთდეს ტრამპის [ადმინისტრაციის პირობებში აშშ-თან ურთიერთობების გამოსწორებაზე]. აქ მაინც მოზომილი რიტორიკაა, ბოლო პერიოდში ეს განსაკუთრებით შეინიშნება, რომ „აი, „დიფ სტეიტს“ თუ დაამარცხებს [ტრამპი]…“, მაგრამ არ უჩანს ასეთი პირი, რომ „დიფ სტეიტი“ მარცხდება, შესაბამისად, ეს [აშშ-ის] პოლიტიკა არ გადაიხედება

ეს რიტორიკა იმაზე მიუთითებს, რომ მზაობა, სავარაუდოდ, იმისთვის უკვე არსებობს, რომ მაინცდამაინც [აშშ-ის] დამოკიდებულებები შეიძლება არ შეიცვალოს, არ გადაიხედოს და შენ უნდა ადაპტირდე ამ რეალობასთან“, – განაცხადა ლუკა ეხვაიამ.

„42-ე პარალელის“ პოდკასტი 2 აპრილს გამოქვეყნდა. დღეს, 3 აპრილს, დილიდან პროსამთავრობო მედიები ავრცელებენ ბიძინა ივანიშვილთან დაახლოებული სპიკერის, ზაზა შათირიშვილის ვრცელ წერილებს, სადაც ეს უკანასკნელი ირწმუნება, რომ სინამდვილეში ტრამპის ადმინისტრაციასაც “დიპ სტეიტი” და “გლობალური ომის პარტია” აკონტროლებს.

ამ წერილის გავრცელება დროში ემთხვევა “ქართული ოცნების” შესახებ ვაშინგტონში გაკეთებულ პირველ შეფასებასა და კრიტიკას, რომელიც ივანიშვილის გუნდმა  დაიმსახურა “განგრძობითი ანტიდემოკრატიული ქმედებებისა” და “მოწინააღმდეგეების დაჭერისა” და “დაცენზურების” გამო.

“ქართული ოცნება“ არ უნდა დაელოდოს იმას, რასაც ამერიკაში ელოდებიან, კერძოდ, „დიფ სთეითის“ რებრენდინგს, რომელსაც დაახლოებით ერთი წელიწადი დასჭირდება. ამასაც მარტივი ახსნა აქვს – როგორც კი „დიფ სთეითის“ რებრენდინგი დასრულდება, ის საქართველოს გაძლიერებული ტრამპის ხელით შემოუბრუნდება და აგენტურით მის ჩანაცვლებას კიდევ ერთხელ შეეცდება. ამიტომ, „ქართულმა ოცნებამ“ საზოგადოება ახალი ადმინისტრაციის ხელით „დიფ სთეითის“ ახალი შეტევისთვის წინასწარ უნდა შეამზადოს”, – წერს შათირიშვილი.

“გლობალური ომის პარტია” არის “ქართული ოცნების” შეთქმულების თეორია, რომლის საფუძველზეც ეს პარტია ქვეყანას მართავს და საგარეო ურთიერთობებს განსაზღვრავს.

ცოტა ხნის წინ “ოცნების” ლიდერებმა შეწყვიტეს ამ ტერმინის (გლობალური ომის პარტია) გამოყენება და ის Deep State-ით ჩაანაცვლეს. „ოცნება“ ჯერ აცხადებდა, რომ “დიფ სთეითი” გლობალური ომის პარტიის “არაფორმალური გავლენის მთავარ ინსტრუმენტი“ იყო ანუ ეს ორი სხვადასხვა “ორგანიზაციაა”. „ოცნების“ კონსპირაციის ბოლო ვერსიით კი, Deep State იგივე გლობალური ომის პარტიაა.

„ოცნებას“ ამ დრომდე კონსპირაციების დამადასტურებელი არავითარი მტკიცებულება არ წარმოუდგენია, ვერც აკონკრეტებს, ვინ არის „გლობალური ომის პარტიის“ ხელმძღვანელი.

სინამდვილეში, ყველას ვისაც „ოცნება“ „გლობალურ ომის პარტიაში“ მოიაზრებს, ერთი რამ აერთიანებთ – სხვადასხვა დროს სხვადასხვა საკითხის გამო საქართველოს ხელისუფლება გაუკრიტიკებიათ.

ზოგადად, „დიფ სთეითი“ უფრო გლობალური კონსპირაციის თეორიაა და აღნიშნავს ჩრდილოვანი მმართველობის სისტემას, რომელშიც არაოფიციალური პირები სახელმწიფო პოლიტიკის განსაზღვრასა და განხორციელებაში მნიშვნელოვან როლს ასრულებენ.

მასალების გადაბეჭდვის წესი