ცესკომ პარტიული სიები გაუუქმა სამ ოპოზიციურ პოლიტიკურ გაერთიანებას-„კოალიცია ცვლილებისთვის გვარამია მელია გირჩი დროას“, „ერთიანობა-ნაციონალური მოძრაობის“ და „ძლიერი საქართველო-ლელო, ხალხისთვის, თავისუფლებისთვის“.
შესაბამისად, ამ გაერთიანებების პარტიული სიით წარდგენილ დარჩენილ კანდიდატებს რეგისტრაცია გაუუქმდათ. ეს იმას ნიშნავს, რომ თუ ამ პოლიტიკური ძალების წარმომადგენლები სადეპუტატო მანდატებს დატოვებენ, მათ პარლამენტში პარტიული სიიდან ადგილმონაცვლე აღარ ეყოლებათ.
„გადაწყვეტილება ცესკომ აღნიშნული პარტიების მომართვის საფუძველზე კანონმდებლობის შესაბამისად მიიღო. თუმცა აქვე გვინდა გამოვეხმაუროთ აღნიშნული პოლიტიკური სუბიექტების განცხადებებს სიების გაუქმებასთან დაკავშირებით და განვაცხადოთ, რომ უწყების გადაწყვეტილება სიების გაუქმებასთან დაკავშირებით არ ნიშნავს, რომ საარჩევნო ადმინისტრაცია იზიარებს პარტიების შეფასებებს არჩევნებთან დაკავშირებით. აღნიშნული გადაწყვეტილებების მიღებისას საარჩევნო ადმინისტრაციამ იხელმძღვანელა მხოლოდ და მხოლოდ საქართველოს საარჩევნო კანონმდებლობით.
ცესკო არ იზიარებს პოლიტიკური პარტიების მიერ სიების გაუქმებასთან დაკავშირებით გამოგზავნილ წერილებში გამოთქმულ პოლიტიკური ხასიათის და უსაფუძვლო შეფასებებს საქართველოს პარლამენტის 2024 წლის 26 ოქტომბრის არჩევნებისა და აღნიშნული არჩევნების შედეგების შემაჯამებელი ოქმის შესახებ. ვთვლით, რომ აღნიშნული შეფასებები პოლიტიკური დღის წესრიგიდან გამომდინარეობს და არ ასახავს რეალობას.
ცესკო ხაზგასმით აცხადებს, რომ საქართველოს პარლამენტის 2024 წლის 26 ოქტომბრის არჩევნები ჩატარდა საქართველოს კონსტიტუციით გათვალისწინებული პრინციპების სრული დაცვით და ცესკოს მიერ შედგენილი იქნა კანონშესაბამისი არჩევნების შედეგების შემაჯამებელი ოქმი.
პარტიული სიების გაუქმების შესახებ ცესკოს თავმჯდომარის განკარგულებები და წერილები გაეგზავნებათ შესაბამის პოლიტიკურ გაერთიანებებს“, – აცხადებს ცესკო.
პარლამენტის პირველი სხდომა, რომლის ლეგიტიმურობასაც არც ოპოზიცია, არც პრეზიდენტი და არც სამოქალაქო სექტორი არ აღიარებს, პროტესტის ფონზე გაიხსნა. შესაბამისად, ამ დროისთვის საქართველოს პარლამენტი ერთპარტიულად, მხოლოდ „ქართული ოცნების“ წევრების შემადგენლობით ფუნქციონირებს.
ჯერჯერობით უცნობია, მიიღებს თუ არა სიების ჩახსნის გადაწყვეტილებას პარტია „გახარია – საქართველოსთვის“. როგორც გიორგი გახარია აცხადებს, საპარლამენტო მანდატებს მაშინ დატოვებენ, როცა ამას თავად ჩათვლიან საჭიროდ. გახარიას თქმით, მისი პარტია პარლამენტს ლეგიტიმაციას არ მისცემს, თუმცა სხვა ბარიერგადალახული ოპოზიციური პარტიებისგან განსხვავებით, ამ ეტაპზე ისინი არც საარჩევნო სიების ჩახსნას და არც მანდატების დატოვებას აპირებენ.
