მშრალ შიმშილობაზე მყოფი ისაკო დევიძე, რომელიც დღეს კლინიკა “ვივამედში” გადაიყვანეს, ისევ იზოლატორში დააბრუნეს. ამის შესახებ ინფორმაციას მისი ადვოკატი ლაშა ტყეშელაძე ავრცელებს.

“ისაკო დევიძე ისევ დააბრუნეს ზაჰესის იზოლატორში … ვივამედის ექიმი არც ადვოკატებს გაგვესაუბრა და არც ოჯახის წევრებს, ისაკოს ჯანმრთელობის შესახებ რომ მოეწოდებინა ინფორმაცია! ისაკოს სჭირდება 24-საათიანი სამედიცინო მეთვალყურეობა, რადგან არის მშრალ შიმშილზე – წყალსაც არ იღებს და იმის მაგივრად ვივამედიში დაეტოვებინათ, ისევ იზოლატორში გადაიყვანეს!! სისტემის ანგარიშსწორება თავისუფალ ადამიანებზე გრძელდება”, – აცხადებს ადვოკატი.

მშრალი შიმშილობისას ადამიანი წყალს არ სვამს, რაც ორგანიზმზე მძიმე კვალს ტოვებს.

ისაკო დევიძეს წვრილმანი ხულიგნობისა და პოლიციელის კანონიერი მოთხოვნისადმი დაუმორჩილებლობის ბრალდებით 8-დღიანი პატიმრობა 20 ნოემბერს შეუფარდეს. მან მშრალი შიმშილობა გამოაცხადა.