დონალდ ტრამპმა, რომელიც აშშ-ის საპრეზიდენტო არჩევნებში იმარჯვებს, განაცხადა, რომ მისი პრეზიდენტობის წლები „ამერიკის ოქროს ხანა იქნება“.

ამის შესახებ ტრამპმა ფლორიდაში განაცხადა, თავის მხარდამჭერებისთვის მიმართვისას, სადაც მას შეუერთდნენ ოჯახის წევრები, ასევე მისი ვიცე-პრეზიდენტობის კანდიდატი ჯეი-დი ვენსი და აშშ-ის წარმომადგენელთა პალატის სპიკერი მაიკ ჯონსონი.

ტრამპის თქმით, „ეს იყო ყველა დროის დიდებული პოლიტიკური მოძრაობა“.

„მინდა მადლობა გადავუხადო ამერიკელ ხალხს განსაკუთრებული პატივისთვის, რომ ამირჩიეს 47-ე და 45-ე პრეზიდენტად… ყოველდღე ვიბრძოლებ თქვენთვის, თქვენი ოჯახებისთვის და თქვენი მომავლისთვის… მე არ მოვისვენებ მანამ, სანამ არ მივაღწევთ ძლიერ, უსაფრთხო და აყვავებულ ამერიკას, რომელსაც ჩვენი შვილები და თქვენ იმსახურებთ. ეს ნამდვილად იქნება ამერიკის ოქროს ხანა“, – განაცხადა ტრამპმა.

დონალდ ტრამპის თქმით, მისი გამარჯვება დაეხმარება ქვეყანას „გამოჯანმრთელებაში“.

„ჩვენ გვაქვს ქვეყანა, რომელსაც დახმარება სჭირდება. ჩვენ ვაპირებთ გამოვასწოროთ ჩვენი საზღვრები და ყველაფერი ჩვენი ქვეყნის შესახებ“, – თქვა ტრამპმა.

5 ნოემბერს აშშ-ში საპრეზიდენტო არჩევნები ჩატარდა, რომელშიც რესპუბლიკელი დონალდ ტრამპი იმარჯვებს.