მოლდოვის პრეზიდენტი მაია სანდუ ამბობს, რომ რეფერენდუმში ევროპულმა არჩევანმა გაიმარჯვა.
„მოლდოვის ხალხმა არჩევანი გააკეთა: ჩვენი ევროპული მომავალი ახლა კონსტიტუციით იქნება გამაგრებული. ჩვენ სამართლიანად ვიბრძოდით უსამართლო ბრძოლაში და გავიმარჯვეთ. მაგრამ ბრძოლა არ დასრულებულა. ჩვენ გავაგრძელებთ სწრაფვას მშვიდობის, კეთილდღეობისა და თავისუფალი მომავლის ასაშენებლად“, — წერს სანდუ X-ზე.
The people of Moldova have spoken: our EU future will now be anchored in the constitution. We fought fairly in an unfair fight—and we won.
But the fight isn’t over. We will keep pushing for peace, prosperity, and the freedom to build our own future.
— Maia Sandu (@sandumaiamd) October 21, 2024
მოლდოვაში 20 ოქტომბერს საპრეზიდენტო არჩევნები და ევროკავშირში გაწევრიანების კონსტიტუციაში ასახვაზე რეფერენდუმი ჩატარდა.
ხმათა 99,82%-ის დათვლის შედეგად, 50.42% მხარს უჭერს კონსტიტუციის ცვლილებას ქვეყნის ევროკავშირში ინტეგრაციის მიზნით, 49.58%-მა კი ხმა წინააღმდეგ მისცა.
მოქმედი პრეზიდენტი მაია სანდუ დიდი უპირატესობით (42.41%) ლიდერობს საპრეზიდენტო არჩევნებში, თუმცა ხმათა 50%-ზე მეტი ვერც ერთმა კანდიდატმა დააგროვა და მეორე ტური ჩატარდება.
სანდუს გამარჯვება უკვე მიულოცა ევროკომისიის პრეზიდენტმა ურსულა ფონ დერ ლაიენმა.
„შენ ეს ისევ შეძელი! რუსეთის ჰიბრიდული ტაქტიკის ფონზე მოლდოვა აჩვენებს, რომ დამოუკიდებელია, ძლიერია და ევროპული მომავალი უნდა!“, — ნათქვამია მაია სანდუსა და მოლდოველი ხალხისადმი ევროკომისიის პრეზიდენტის მილოცვაში.
მაია სანდუს თქმით, არსებობს „მკაფიო მტკიცებულება“, რომ კრიმინალური ჯგუფები, რომლებიც მუშაობდნენ მოლდოვის „ეროვნული ინტერესებისადმი მტრულად განწყობილ უცხო ძალებთან“, ცდილობდნენ 300 000 ხმის ყიდვას.
კიშინიოვის თანახმად, აეროპორტში მოსკოვიდან ნაღდი ფულის შემოტანის არაერთი საეჭვო მცდელობა დაფიქსირდა — მხოლოდ ერთ დღეში 1,5 მილიონი დოლარი ამოიღეს, რომლის დაბრუნება არავის უთხოვია.
კრემლმა მოლდოვას მოუწოდა ქვეყნის არჩევნებში ჩარევასთან დაკავშირებით მტკიცებულებების წარდგენისკენ, თავად არჩევნების შედეგები კი ეჭვქვეშ დააყენა. ევროკავშირმა განაცხადა, რომ მოლდოვაში არჩევნები ჩატარდა რუსეთისა და მისი მარიონეტების უპრეცედენტო ჩარევისა და დაშინების ქვეშ, რაც დემოკრატიული პროცესის დესტაბილიზაციას ისახავდა მიზნად.
