თბილისში რამდენიმე თვის წინ დაკავებული აზერბაიჯანელი ჟურნალისტის, აფგან სადიგოვის ცოლის, სევინჩ სადიგოვას თქმით, ამ დრომდე მისთვის არავის უცნობებია ქმრის ჯანმრთელობის მდგომარეობის შესახებ.
როგორც სევინჩ სადიგოვა ამბობს, მისი ქმარი თბილისის იზოლატორში შიმშილობის მე-17 დღეს შეუძლოდ გახდა და საავადმყოფოში გადაიყვანეს.
“ვთხოვე, დამალაპარაკეთ ჩემს ქმარს, ხმა გავიგო. ვერ დაგალაპარაკებთო. ალბათ, ძალიან ცუდადაა. გვიან ღამით დამირეკეს, მაგრამ არ ვიცი, ვინ იყო. მითხრა, ციხიდან ვრეკავ და თქვენი ქმარი ცუდად გახდაო. ის საავადმყოფოში გადაიყვანეს. საერთოდ არ ვიცი, ახლა იქ რა ხდება. ისიც არ ვიცი, ცოცხალია ახლა თუ არა. არც კი ვიცი, რომელი საავადმყოფოა, მაგრამ ციხის თანამშრომელმა მითხრა, რომ ის გლდანში მდებარეობს. ადვოკატები დღეს დილიდანვე წავლენ. მეც უნდა წავიდე, თუმცა არ ვიცი, შემიშვებენ თუ არა” ,– ამბობს ნეტგაზეთთან საუბრისას აფგან სადიგოვის ცოლი, სევინჩ სადიგოვა.
კლინიკაში სავარაუდო გადაყვანამდე რამდენიმე საათით ადრე სევინჩ სადიგოვა ამბობდა, რომ შიმშილობის მე-17 დღეს მის ქმარს აღარ შეუძლია დამოუკიდებლად გადაადგილება.
“მისი მდგომარეობა ძალიან ცუდია. დღეს მისი შიმშილობის მე-17 დღეა. ეს ყველაფერი კი აზერბაიჯანში უკანასკნელი დაპატიმრების დროს 242- დღიანი შიმშილობის შედეგია. ის არ არის ისეთ მდგომარეობაში, რომ შიმშილობა შეძლოს, თუმცა ამბობს, რომ თუ სახელმწიფოში კანონი არ მუშაობს და მხოლოდ პოლიტიკურ ბრძანებებს ასრულებენ, სხვა გზა არ არსებობს. სწორედ ამიტომ შიმშილობს ის. აფგანს გადაადგილებაში ეხმარებიან, რადგან დამოუკიდებლად სიარული აღარ შეუძლია. მისი ჯანმრთელობა განადგურებულია”.
ორგანიზაციის ადვოკატებმა მოითხოვეს აზერბაიჯანელი ჟურნალისტისთვის აღმკვეთი ღონისძიების სახით საექსტრადიციო 3- თვიანი პატიმრობის ჩანაცვლებას 2000 ლარის ოდენობის გირაოთი.
სააპელაციო საჩივარს თან ერთოდა სადიგოვის განცხადება, რომლითაც საქართველოს შინაგან საქმეთა სამინისტროს მიგრაციის დეპარტამენტის მიმართა საქართველოში საერთაშორისო თავშესაფრის მოთხოვნით.
როგორც ამბობენ ორგანიზაციაში „უფლებები საქართველო“, რომელიც სადიგოვის ინტერესებს იცავს, „არსებობს ეჭვი, რომ ქართული მხარე სადიგოვის აზერბაიჯანში ექსტრადიციას გამარტივებული წესით გეგმავს“.
ექსტრადიცია დაუშვებელია, თუ მისი საფუძველი პოლიტიკურია.
თბილისში ბაქოს მოთხოვნით დაკავებულ ჟურნალისტს, აფგან სადიგოვს თბილისის საქალაქო სასამართლომ საექსტრადიციო პატიმრობა შეუფარდა. ამ შუამდგომლობით სასამართლოს პროკურატურამ მიმართა.
საქართველოს ახალგაზრდა იურისტთა ასოციაციის თავმჯდომარის, იურისტ ნონა ქურდოვანიძის შეფასებით, ჟურნალისტ აფგან სადიგოვის აზერბაიჯანისათვის გადაცემა ექსტრადიციის პირობებს ვერ აკმაყოფილებს.
აფგან და სევინჩ სადიგოვები, ორ არასრულწლოვან შვილთან ერთად, საქართველოში 2023 წლის ბოლოს ჩამოვიდნენ. მიმდინარე წლის 18 ივლისს აფგან სადიგოვი, თურქეთის გავლით, მესამე ქვეყანაში აპირებდა გადასვლას, თუმცა მისი თქმით, თბილისის საერთაშორისო აეროპორტში საპასპორტო კონტროლის გავლისას უთხრეს, რომ ერთადერთი ქვეყანა, სადაც საქართველოდან წასვლა შეეძლო, აზერბაიჯანი იყო.
დაკავების წინა დღეს, 2 აგვისტოს, აფგან სადიგოვი, ადვოკატთან ერთად, საქართველოს სახალხო დამცველ ლევან იოსელიანს შეხვდა. მისი თქმით, შეხვედრამ ნორმალურად ჩაიარა, ომბუდსმენმა წუხილი გამოთქვა, რომ ჟურნალისტს საქართველოს დატოვება აეკრძალა და საკითხის გარკვევას დაჰპირდა.