ამ განცხადებით პროკურატურას “ობიექტივის” ყოფილმა ჟურნალისტმა და ნავთობისა და გაზის კორპორაციის პრესსამსახურის ხელმძღვანელმა ნინო ჯღარკავამ 24 ოქტომბერს მიმართა. იგი აცხადებდა, რომ გადაცემა „განსხვავებულ აქცენტებში“ ვრცელდებოდა მისი და ვლადიმერ ბედუკაძის სახელით განხორციელებული ყალბი მიმოწერა „ფეისბუქის“ საშუალებით ე.წ. ციხის კადრებთან დაკავშირებით.
პროკურატურის განცხადებით, ჯღარკავამ არ გამორიცხა, რომ შესაძლოა ადგილი ჰქონოდა მის „ფეისბუქის“ პროფილზე უკანონო წვდომას.
პროკურატურის განცხადებით, დადგინა, რომ ტელევიზიით გასული ხსენებულ პირებს შორის მიმოწერა არის ყალბი. უწყებამ ასევე წარმოადგინა მიმოწერის ავთენტიკურობის ანალიზიც.
“მიმოწერა წარმოდგენილია ე.წ. „ფეისბუქის“ ,,სქრინშოთების’’ ანუ ფოტოების სახით. მიმოწერასთან მოცემულია მხოლოდ საათი და არსად ჩანს მიმოწერის თარიღი, რაც ხდება მხოლოდ მაშინ, როდესაც ე.წ. ,,სქრინშოთები’’ იქმნება მიმოწერის განხორციელების დღეს. ნებისმიერ სხვა შემთხვევაში, საათთან ერთად მოცემული უნდა იყოს თარიღიც. გარდა ამისა, ხსენებულ „სქრინშოთებზე“, „ფეისბუქის“ გვერდის მარჯვენა მხარეს მითითებულია წელი – 2012, ანუ სქრინშოთი შექმნილი უნდა იყოს 2012 წელს და უშუალოდ მიმოწერის განხორციელების დღეს, რაც არ დასტურდება.
ამავე “სქრინშოთზე” ერთ-ერთ მეგობრობის შემოთავაზებაში ფიგურირებს მომხმარებელი „Nikoloz Xucishvili”. მისი პროფილის გახსნისა და დათვალიერების შედეგად დგინდება, რომ პროფილი შექმნილია 2014 წელს და ის 2012 წელს არ არსებობდა, რაც შეეხება პროფილზე განთავსებულ ფოტოს – ის გადაღებულია 2014 წელს, რაც დასტურდება სურათზე გამოსახული პიროვნების გამოკითხვით. ასევე დაზუსტებით შეიძლება ითქვას, რომ ყალბი “სქრინშოტი” შექმნილია 2014 წლის 12 ოქტომბრის შემდგომ პერიოდში, ვინაიდან სწორედ ამ დღეს აიტვირთა „Nikoloz Xucishvili”-ს პროფილზე ის ფოტო, რომელიც ფიგურირებს გადაცემა „განსხვავებული აქცენტებში“ გავრცელებულ „სქრინშოთზე“, რაც თავის მხრივ ემთხვევა გამოკითხული ჟურნალისტის ლაშა ბერულავას მიერ მითითებულ თარიღს, რომ 2014 წლის ოქტომბრის ბოლოს მისთვის უცხო პიროვნებისაგან ჩაუვარდა ხელში ეს მასალა. ანალოგიური ვითარებაა „სქრინშოთზე“ მოცემულ კიდევ ერთი მომხმარებლის – „Toni Montana”-ს პროფილთან მიმართებაშიც, რომელიც ასევე შექმნილია 2014 წელს. ამდენად, აღნიშნულის გათვალისწინებით უტყუარად დგინდება, რომ ტელევიზიით გავრცელებული 2012 წლით დათარიღებული მიმოწერა „სქრინშოთების“ სახით არის ყალბი.
აღნიშნული გარემოება თავისუფლად შეიძლება გადამოწმდეს ნებისმიერ ინტერნეტ-მომხმარებელის მიერ და ამას არ სჭირდება რაიმე სპეციალური ცოდნა.
აღსანიშნავია ის გარემოებაც, რომ გადაცემა „განსხვავებული აქცენტების“ წამყვანის ეკა კვესიტაძის თქმით, მის გადაცემაში გასული მიმოწერა უნდა იყოს „სავარაუდოდ“ 2012 წლის სექტემბრის თვეში განხორციელებული. ამ პერიოდში კი, ჯღარკავასა და ბედუკაძის განცხადებით, ისინი საერთოდ არ იცნობდნენ ერთმანეთს, რაც დაადასტურეს სხვა გამოკითხულმა პირებმაც. ასევე, ნინო ჯღარკავამ და ვლადიმერ ბედუკაძემ დაადასტურეს 2012 წლის 30 ოქტომბრიდან „ფეისბუკის“ საშუალებით მათ შორის მიმოწერის არსებობის ფაქტი, თუმცა განმარტეს, რომ რეალური მიმოწერა ატარებდა სულ სხვაგვარ შინაარსს და ,,განსხვავებულ აქცენტებში’’ გასულ მიმოწერასთან არაფერი საერთო არ ჰქონდა, რაც დადასტურდა მათ შორის „ფეისბუკის“ საშუალებით რეალურად არსებული მიმოწერის დათვალიერებით,”– აღნიშნულია პროკურატურის განცხადებაში.
პროკურატურის განცხადებით, იმის გათვალისწინებით, რომ მიმოწერა ცალსახად გაყალბებულია და რეალურად ასეთ საუბარს ადგილი არ ჰქონია, არ მომხდარა კერძო კომუნიკაციის საიდუმლოების დარღვევაც. შესაბამისად, ვინაიდან არ გამოიკვეთა საქართველოს სისხლის სამართლის კოდექსის 158-ე მუხლით გათვალისწინებული დანაშაულის ნიშნები, ისინი გამოძიებას ამ ფაქტზე ვერ დაიწყებენ. ამასთანვე, პროკურატურის განცხადებით, მიმოწერა მიმოწერა ფეისბუკზე „სქრინშოთების” სახით არ არის ოფიციალური დოკუმენტი, შესაბამისად, არ არის 362-ე მუხლით გათვალისწინებული დანაშაულის ნიშნებიც, რაც გულისხმობს ოფიციალური დოკუმენტის გაყალბებას.
გარდა ამისა, პროკურატურა აცხადებს, რომ შესაძლებელია გაყალბებული მიმოწერა შეიცავდეს ამა თუ იმ პირის პატივისა და ღირსების შემლახავ ინფორმაციას, თუმცა ამ კატეგორიის დავა განეკუთვნება სამოქალაქო სამართლებრივ სფეროს და სცილდება პროკურატურის კომპეტენციას.
