მას შემდეგ, რაც ეკონომისტმა სოსო ბერიკაშვილმა განაცხადა, რომ კავკასის უნივერსიტეტიდან სახელმწიფო უსაფრთხოების სამსახურის დავალებით გაათავისუფლეს, უნივერსიტეტის დატოვების შესახებ კიდევ 8 ლექტორმა განაცხადა.

მათი პროტესტის მიზეზი, ბერიკაშვილის საქმის გარდა, არის უნივერსიტეტის პოზიცია რუსული კანონის საწინააღმდეგო პროტესტის ფორმებთან დაკავშირებით. უფრო კონკრეტულად, კავკასიის უნივერსიტეტის პრეზიდენტი, კახა შენგელია შეუერთდა იმ 38 რექტორს, რომლებმაც გააკრიტიკეს საკუთარი უნივერსიტეტის ის სტუდენტები და პროფესორ-მასწავლებლები, რომლებიც პროტესტის ნიშნად გაიფიცნენ.

კავკასიის უნივერსიტეტს ტოვებენ  ჟურნალისტები –  ნიკო ნერგაძე, დავით ქაშიაშვილი და სალომე უგულავა.

„კავკასიის უნივერსიტეტის ხელმძღვანელობამ ბოლო დღეებში დაიჭირა პოზიცია, რის გამოც ჩემთვის მათთან ურთიერთობის გაგრძელდება შეუძლებელი ხდება. ჯერ პოლიტიკური ნიშნით სამსახურიდან გააგდო ეკონომიკის სკოლის დეკანი სოსო ბერიკაშვილი, შემდეგ კი ხელი მოაწერა განცხადებას, რომლის სულისკვეთებასაც ეწინააღმდეგება სტუდენტებისა და ლექტორების დიდი ნაწილი,“ — დაწერა ნერგაძემ სოციალურ ქსელში.

“ბოლო 10 წელია, სხვადასხვა უნივერსიტეტში ვასწავლი, მათ შორის, 4 წელია – კავკასიის უნივერსიტეტში. მედიის სკოლის ყველა სტუდენტი მაღალი მოქალაქეობრივი პასუხისმგებლობითა და ეროვნული ღირებულებისადმი პატივისცემით სავსე ახალგაზრდაა. მათგან ბევრი რამ მისწავლია და ვსწავლობ ახლაც. სწორედ, მათი პატივისცემითა და სიყვარულით, მიმდინარე სემესტრს დავხურავ. ადმინისტრაციის პოზიციისა და გადაწყვეტილებების გამო, კავკასიის უნივერსიტეტთან თანამშრომლობას ვწყვეტ”, – წერს დავით ქაშიაშვილი.

“კავკასიის უნივერსიტეტში პატარა მივედი. ვასწავლი უკვე 6 წელზე მეტია. ყოველთვის მიმეჩქაროდა აუდიტორიაში იმიტომ, რომ საუკეთესო ბავშვები მხვდებოდნენ – სხარტები, ნათელი გონების და სწორი ღირებულებების. უნივერსიტეტი არის ადამიანები და არა შენობა. დაუშვებელია, დღეს ნათელ მხარეს არ იდგე. ამიტომ, ვწყვეტ თანამშრომლობას”, – ამბობს სალომე უგულავა.

უნივერსიტეტი დატოვა ნინო რობაქიძემაც. მისი თქმით, უნივრსიტეტის ქმედებები ეწინააღმდეგება იმ ღირებულებებს, რისიც სჯერა და რასაც სტუდენტებს ასწავლიდა.

„ამ წლების განმავლობაში ვკითხულობდი რამდენიმე საგანს, თუმცა სისტემატურად ვკითხულობდი „გამოხატვის თავისუფლების მსოფლმხედველობრივ საფუძვლებს“. დღეს უნივერსიტეტის მიერ დაკავებული პოზიცია, რაც გამოიხატა უნივერსიტეტების ნაწილის მიერ გავრცელებული განცხადებით და ასევე, თანამშრომლის პოლიტიკური საფუძვლით სამსახურიდან გაშვებით, ეწინააღმდეგება ყველაფერს, რისიც მჯერა და რასაც ვასწავლიდი ჩემს სტუდენტებს,“ — წერს რობაქიძე ფეისბუკზე.

უნივერსიტეტის ტოვების ლევან ბერძენიშვილიც. ამის შესახებ მანაც სოციალურ ქსელში დაწერა.

„ჩემთვის აბსოლუტურად მიუღებელია კავკასიის უნივერსიტეტის პრეზიდენტის პოზიცია, შესაბამისად, ვტოვებ ამ დაწესებულებას და უსაყვარლეს სტუდენტებს,“ — თქვა ბერძენიშვილმა.

უნივერსიტეტი დატოვეს ლევან მოსიაშვილმა, რუსუკო კობახიძემ და დავით ჭუმბურიძემაც.

კავკასიის უნივერსიტეტის პრეზიდენტს, კახა შენგელიას საჯაროდ მიმართა “შავი ზღვის უნივერსიტეტის” მიწვეულმა ლექტორმა გიორგი შაიშმელაშვილმა. შენგელია ამ უნივერსიტეტის რექტორია მას შემდეგ, რაც “კავკასიის უნივერსიტეტი” “შავი ზღვის უნივერსიტეტის” ერთ-ერთი მფლობელი გახდა.

„მე პირადად გულწრფელად მჯერა, რომ იმ შემადგენლობასთან ერთად, ამ შინაარსის და სტილისტიკის ტექსტზე, თქვენი ბიოგრაფიის კაცი, არა უბრალოდ ეთიკური, არამედ ესთეტიკური მოსაზრებებითაც კი არ მოაწერდა ხელს, ზეწოლის გარეშე.

თუმცა, მიმაჩნია, რომ სწორედ ეს ფაქტი, კიდევ უფრო ამძიმებს თქვენს პასუხისმგებლობას. განსხვავებით სახელმწიფო უსაფრთხოების სამსახურის მიერ დანიშნული სხვა ხელმომწერი რექტორებისგან, რომელთა კარიერა, მთლიანად პარტიულ კეთილგანწყობაზეა დამოკიდებული, თქვენ ნამდვილად ვალდებული იყავით გაგეძლოთ ელემენტარული დისკომფორტისთვის, როგორც ეს თქვენმა რამდენიმე კოლეგამ გააკეთა. ამისთვის, საკმარისი იქნებოდა ოდნავი ემპათია მაინც გამოგეჩინათ თქვენი სტუდენტების მიმართ, რომლებიც დღე და ღამეს ასწორებენ და ფიზიკური რისკის ფასად იცავენ ქვეყნისა და საკუთარ მომავალს,“ — წერს შაიშმელაშვილი და დასძენს, რომ გათავისუფლების შესახებ განცხადებას არ წერს “მხოლოდ და მხოლოდ სტუდენტების ინტერესების გამო”.

აღსანიშნავია, რომ კავკასიის უნივერსიტეტი იყო ერთ-ერთი პირველი, რომელმაც რუსული კანონის საწინააღმდეგო პროტესტის დაწყების შემდეგ, სოციალურ ქსელში, ქვეყნის ევროპულ მომავალს დაუჭირა მხარი.

„ქართული ოცნების“ მიერ რუსული კანონის მიღების მცდელობის პარალელურად გაიფიცა 30-ზე მეტი უნივერსიტეტის სტუდენტთა ნაწილი. მათ შეუერთდნენ პროფესორ-მასწავლებლებიც.

აღსანიშნავია, რომ იქამდე, სანამ რექტორები საკუთარი უნივერსიტეტების სტუდენტებსა და პროფესორ-მასწავლებლებს საჯაროდ გააკრიტიკებდნენ, “მთავარმა არხმა” განაცხადა, რომ მათზე ზეწოლას განათლების სამინისტრო ახდენდა. რექტორების მიერ ერთობლივი განცხადების გამოქვეყნებამდე ერთი დღით ადრე, 13 მაისს, ტელევიზიამ, ანონიმურ წყაროზე დაყრდნობით გაავრცელა ინფორმაცია, რომ წერილი სამინისტროში დაიწერა და უნივერსიტეტებში ხელმოსაწერად გადაიგზავნა.