პარლამენტის თავმჯდომარემ შალვა პაპუაშვილმა რუსული კანონის განხილვისას პლენარული სხდომის დარბაზიდან გააძევა ოპოზიციონერი დეპუტატები — თაკო ჩარკვიანი და სალომე სამადაშვილი.
ჩარკვიანი სიტყვით გამოსვლისას რუსული კანონის საწინააღმდეგო აქციის დარბევაზე საუბრობდა, რის გამოც პაპუაშვილმა მას მიკროფონი გაუთიშა. ამის შემდეგ თაკო ჩარკვიანმა სხდომაზე ყვირილი დაიწყო, რათა მისი ნათქვამი ყველას გაეგო. პაპუაშვილმა ის რამდენჯერმე გააფრთხილა, რომ თუ არ გაჩუმდებოდა, სხდომიდან გააძევებდა.
„არ მოგცემთ აქ მიტინგის ჩატარების საშუალებას“, — უთხრა მან ჩარკვიანს და მანდატურებს მოუწოდა, დეპუტატი დარბაზიდან გაეყვანათ.
რამდნეიმე წუთის შემდეგ პაპუაშვილმა იმავე მიზეზით გააძევა დარბაზიდან სალომე სამადაშვილიც, რომელმაც სიტყვით გამოსვლა კრემლის იდეოლოგის, პროპაგანდისტ დუგინის შესახებ საუბრით დაიწყო.
შალვა პაპუაშვილი მიკროფონს უთიშავს ყველა დეპუტატს, ვინც მისი შეფასებით “არათემატურ” საკითხზე საუბრობს.
ამ წუთებში პარლამენტი რუსულ კანონს მე-2 მოსმენით პლენარულ სხდომაზე განიხილავს. დღესვეა დაგეგმილი კანონპროექტის კენჭისყრა. პარლამენტში კვლავ აკრძალულია ყველა მედიის მუშაობა, გარდა ტელევიზიებისა.
პარალელურად, სოციალურ ქსელში რეგიონებში მცხოვრები მოქალაქეები თვითორგანიზებულად გეგმავენ თბილისში ჩამოსვლას რუსული კანონის საპროტესტო აქციებში მონაწილეობის მისაღებად. მაგალითად, 12:00 საათიდან მოქალაქეთა კოლონა ბათუმიდან გამოემართება დედაქალაქისკენ. ორგანიზებული მსვლელობებით აპირებენ თბილისში ჩამოსვლას მოქალაქეები სხვა ქალაქებიდანაც, რათა შეუერთდნენ საღამოს პარლამენტთან დაგეგმილ აქციას.
