ქართული ნაციონალური ბალეტის, ანსამბლ „სუხიშვილების“ დირექტორი ნინო სუხიშვილი ხელისუფლებას აკრიტიკებს რუსული კანონის ხელახლა შემობრუნების გამო, რამაც შეიძლება საფრთხე შეუქმნას საქართველოს ინტეგრაციას ევროკავშირში.
„ჩემთვის ძალიან გასაკვირია, რატომ მოითხოვს ეს ხელისუფლება ასე დაჟინებით ამ პროექტის დამტკიცებას, რადგან ზუსტად ერთი წლის წინ ეს კანონპროექტი ჩავარდა და ეს იყო ჩვენი საზოგადოების დიდი ნაწილის პროტესტის შედეგი. გასაკვრიია, რომ წელს კიდევ წარმოიშვა ამ კანონპროექტის გატანის იდეა, არაფერი არ არის შეცვლილი ერთ სიტყვის გარდა — „აგენტია“ ამოღებული და პრინციპში, იგივეა.
ის ორგანიზაციები, რომლებიც ამ კანონის ქვეშ მოექცევიან, არ მიმაჩნია, რომ არიან უცხო ქვეყნების ინტერესების მატარებლები. პირიქით, ისინი იცავენ საქართველოს დემოკრატიულ გზას. ვშიშობ, რომ ეს კანონი ჩვენს მეგობარ ქვეყნებს ჩვენს ქვეყანაზე აზრს შეუცვლის“ ,— თქვა ნინო სუხიშვილმა 9 აპრილს ტვ პირველის ეთერში.
მსგავსი კანონის მიღებამ რუსეთში სრულად გააქრო დამოუკიდებელი სამოქალაქო ორგანიზაციები და მედიასაშუალებები. დროთა განმავლობაში რუსეთი აღნიშნულ კანონს სულ უფრო ამკაცრებდა და ის ამჟამად ვრცელდება ფიზიკურ პირებსა და ნებისმიერ ადამიანზე, რომელიც რაიმე ფორმით იღებს ფულს დასავლეთისგან.
