საქართველოს შინაგან საქმეთა სამინისტროს განცხადებით, „სილქნეტის“ 5000-მდე მომხმარებლის პერსონალური მონაცემების მოპარვის საქმეზე 23 წლის მოქალაქე დააკავეს.

უწყების განცხადებით, ბ.კ-მ პერსონალური მონაცემების დაუფლების მიზნით სს „სილქნეტის“ კომპიუტერულ სისტემაზე კიბერშეტევა განახორციელა:

„ბრალდებული კომპიუტერულ სისტემაში უნებართვო შეღწევის გზით დაეუფლა აღნიშნული კომპანიის 5000-მდე მომხმარებლის პირადობის დამადასტურებელი მოწმობის ციფრულ ასლს და არალეგალური გზით ცდილობდა მათ ინტერნეტ სივრცეში რეალიზაციას.  კომპიუტერულ სისტემაში უნებართვო შეღწევის ფაქტზე გამოძიება საქართველოს სისხლის სამართლის კოდექსის 284-ე მუხლის მე-3 ნაწილით მიმდინარეობს“, — ნათქვამია უწყების მიერ გავრცელებულ განცხადებაში.

ბრალი დამტკიცების შემთხვევაში 6 წლამდე პატიმრობას ითვალისწინებს.