ცოლის განზრახ მკვლელობის მცდელობის ბრალდებით 46 წლის კაცი დააკავეს. შინაგან საქმეთა სამინისტროს ინფორმაციით, კაცმა დაჭრა ცოლის ნათესავი, 14 წლის არასრულწლოვანიც.
შემთხვევა კახეთში, ახმეტის მუნიციპალიტეტში მოხდა.
“გამოძიებით დადგინდა, რომ ბრალდებულმა ურთიერთშელაპარაკების ნიადაგზე წარმოშობილი კონფლიქტის დროს, მეუღლე – 1981 წელს დაბადებული თ.ო. და მეუღლის ნათესავი – 2009 წელს დაბადებული გ.მ. ცივი იარაღით დაჭრა, რის შემდეგაც შემთხვევის ადგილიდან მიიმალა.
სამართალდამცველებმა, ჩატარებული საგამოძიებო და სამძებრო მოქმედებების შედეგად, თ.თ. ცხელ კვალზე დააკავეს. პოლიციამ დანაშაულის ჩადენის იარაღი – დანა ნივთმტკიცებად ამოიღო”, – ვკითხულობთ უწყების მიერ გავრცელებულ განცხადებაში.
გამოძიება სისხლის სამართლის კოდექსის 11 პრიმა 19-109-ე მუხლით მიმდინარეობს, რაც გულისხმობს ოჯახის წევრის მიმართ განსაკუთრებული სისასტიკით ჩადენილ განზრახ მკვლელობას. ბრალის დამტკიცების შემთხვევაში კაცს 16-დან 20 წლამდე ან უვადო თავისუფლების აღკვეთა ემუქრება.
