საფრანგეთის პრეზიდენტი ემანუელ მაკრონი უკრაინაში ომის განსახილველად საფრანგეთის ძირითადი პოლიტიკური პარტიის ლიდერებს შეხვდა.

ორსაათნახევრიანი აუდიენციის შემდეგ ზოგიერთი პარტიის ლიდერმა განაცხადა, რომ ახლა უფრო შეშფოთებულია, ვიდრე შეხვედრამდე, რადგან მაკრონი მიემხრო უკრაინის „შეუზღუდავ მხარდაჭერას“ და არ გამორიცხა ჯარის გაგზავნაც.

„მწვანეთა პარტიის“ ლიდერს მარინ ტონდელიეს თქმით, მან მაკრონს უთხრა, რომ პუტინს ზღვარი არ აქვს, რაზეც პრეზიდენტმა უპასუხა: „ჩვენ უნდა ვაჩვენოთ, რომ არც ჩვენ გვაქვს ლიმიტი“.

მარი ლე პენის პარტია „ეროვნული ერთობის“ (RN) პრეზიდენტმა ჯორდან ბარდელამ პრეზიდენტს მოუწოდა, არ წავიდეს რუსეთთან ომზე.

„პრეზიდენტის ხედვაა: „არა — ლიმიტებს და არა — წითელ ხაზებს“, — თქვა ბარდელამ.

კრემლის სპიკერმა დიმიტრი პესკოვმა განაცხადა, რომ მაკრონი „აგრძელებს უკრაინის ომში საფრანგეთის უშუალო ჩართულობის დონის ამაღლებას“.

შეხვედრა დახურული იყო, შესაბამისად, უცნობია, თავად მაკრონმა განაცხადა თუ არა წითელი ხაზების არარსებობის შესახებ, თუ ესაა დასკვნა, რაც პარტიის ლიდერებმა გამოიტანეს.

რუსეთის უშიშროების საბჭოს თავმჯდომარის მოადგილემ დიმიტრი მედვედევმა საპასუხოდ  დაწერა „X“-ზე (ყოფილი Twitter), რომ რუსეთსაც არ ექნება წითელი ხაზი საფრანგეთთან და მტრის წინააღმდეგ ყველაფერი ნებადართულია.