UFC-ის ქართველ-ესპანელი ჩემპიონი ილია თოფურია მადრიდში ჩავიდა, პრესკონფერენცია გამართა და სხვადასხვა საკითხზე ისაუბრა, მათ შორის, ჩემპიონის სტატუსზე, მომავალ მეტოქეებზე და ბიუროკრატიულ სირთულეებზე.
“როდესაც მადრიდში ჩამოვფრინდი, დავფიქრდი, [აეროპორტში] რატომ უნდა გავიარო უცხოელების გასასვლელში? რატომ არ მომილოცა წარმატება ჩვენი ქვეყნის ლიდერმა?”, – განაცხადა ილია თოფურიამ, რომელიც, მართალია, ბევრი წელია ესპანეთში ცხოვრობს, თუმცა ამ ქვეყნის მოქალაქეობა ჯერ არ აქვს. ის მხოლოდ საქართველოს მოქალაქეა.
თოფურიას თქმით, 2024 წელს შემდეგ ბრძოლას მხოლოდ იმ შემთხვევაში დათანხმდება, თუ ის ესპანეთში, სანტიაგო ბერნაბეუზე გაიმართება.
- კონორ მაკგრეგორი
- მაქს ჰოლოვეი, თუ ის თავის სატიტულო ბრძოლას მოიგებს
- შონ ო მაილი, თუ ის ჩიტო ვერას დაამარცხებს
თოფურიას თქმით, ვერ ხედავს ალექს ვოლკანოვსკისთან რემატჩის შესაძლებლობას.
“მე მინდა ისეთი ბრძოლა, რომელიც ფანებს მოეწონებათ. ვის სურს ვოლკთან რემატჩი? ვაცადოთ დასვენება”.
ერთი ბრძოლის შემდეგ, ილია თოფურიას თქმით, სურს, კიდევ ერთ ჩემპიონ ისლამ მახაჩევთან დაპირისპირება, რომელიც ზედა წონაში გამოდის.
“ეჭვი არ მეპარება, რომ ორმაგი ჩემპიონი ვიქნები [ორ სხვადასხვა წონით კატეგორიაში]. თუმცა იქამდე სხვა რაღაცის გაკეთება მსურს”, – თქვა თოფურიამ.
18 თებერვალს UFC-ში გამარჯვება ორმა ქართველმა მებრძოლმა იზეიმა. მერაბ დვალიშვილმა ჰენრი სეხუდო დაამარცხა, ილია თოფურია კი პირველი ქართველი გახდა, რომელმაც UFC-ში საჩემპიონო ქამარი მოიპოვა. თოფურიამ მეორე რაუნდში მსოფლიოს მოქმედი ჩემპიონი, ავსტრალიელი ალექსანდრ ვოლკანოვსკი ნოკაუტით დაამარცხა.
