სოხუმის ეროვნული გალერეის ფონდში 21 იანვრის ხანძრის შედეგად გადარჩენილი 200-მდე ექსპონატის [ნახატები, დოკუმენტები] მდგომარეობას შეაფასებენ აფხაზეთში რუსეთიდან ჩასული სპეციალისტები. ინფორმაციას რუსული მედია ავრცელებს.
“რესტავრაციის გეგმის შესამუშავებლად სპეციალისტები ადგილზე შეაფასებენ იმ ნახატებისა და დოკუმენტების მდგომარეობას, რომლის გადარჩენაც შესაძლებელი გახდა”, – თქვა რუსეთის კულტურის მინისტრმა ოლგა ლუბიმოვამ.
მისივე განცხადებით, მომხდარი ჰუმანიტარული კატასტროფის ტოლფასია აფხაზი კოლეგებისთვის.
სოხუმის ცენტრალურ საგამოფენო დარბაზში ხანძარი გაჩნდა. როგორც აფხაზეთის დე ფაქტო რესპუბლიკის კულტურის სამინისტროში აცხადებენ, ხანძარს დაახლოებით 4 ათასი ნამუშევარი ემსხვერპლა, რომელიც ამავე შენობაში ინახებოდა. ოფიციალური ცნობითვე, 200-მდე ნამუშევრის გადარჩენა მოხერხდა.