სომხეთის ეროვნული კრების [პარლამენტის] ცნობით, პარლამენტის თავმჯდომარემ ალენ სიმონიანმა ოფიციალური წერილით დაუდასტურა რუსეთის სახელმწიფო დუმის თავმჯდომარეს, ვიაჩესლავ ვოლოდინს, რომ მონაწილეობას არ მიიღებს მოსკოვში 19 დეკემბერს დაგეგმილ ОДКБ-ს [კოლექტიური უსაფრთხოების შეთანხმების ორგანიზაცია] საპარლამენტო ასამბლეის სხდომაზე.
ოფიციალური ცნობითვე, მოსკოვში სხდომას არც საპარლამენტო დელეგაცია დაესწრება.
უკანასკნელ პერიოდში ОДКБ-ს სხვა სხდომებს ასევე არ დაესწრნენ პრემიერ-მინისტრი ნიკოლ ფაშინიანი, თავდაცვის მინისტრი და უშიშროების საბჭოს მდივანი.
იქამდე სომხეთის პრემიერ-მინისტრმა ნიკოლ ფაშინიანმა განაცხადა, რომ ვერ დაესწრება მინსკში 23 ნოემბერს დაგეგმილ ОДКБ-ს სხდომას.
„კოლექტიური უსაფრთხოების ხელშეკრულების ორგანიზაცია“ (ОДКБ) ევრაზიაში NATO-ს მსგავსი, რუსეთის მიერ დომინირებული სამხედრო ბლოკია, რომლის მიზანიც წევრი სახელმწიფოების უსაფრთხოების დაცვაა.
ყარაბაღის 2020 წლის ომიდან დღემდე სომხეთის ოფიციალურ პირებს არაერთხელ გაუკეთებიათ განცახდება სომხეთისთვის ორგანიზაციის არაეფექტურობაზე. შესაბამისად, დღემდე სომხეთში ОДКБ-ს წევრობის შენარჩუნების საკითხი პოლიტიკური დისკურსის მთავარ თემად რჩება.
