რუსი პროპაგანდისტი, მარგარიტა სიმონიანი მორიგ ჯერზე აქებს საქართველოს ხელისუფლებას. ამჯერად მისი მოწონება „ქართული ოცნების“ აღმასრულებელი მდივნისა და პარტიის საპარლამენტო ფრაქციის თავმჯდომარის, მამუკა მდინარაძის განცხადებამ დაიმსახურა.
მდინარაძემ „ლელოს“ კანონპროექტზე [რომელიც სანქციებისთვის მიერთებასა და რუსეთის მოქალაქეებისთვის გარკვეული შეზღუდვების დაწესებას ითვალისწინებდა] საუბრისას არ დაუჭირა მხარი რუსეთის საწინააღმდეგო სანქციებისთვის საქართველოს მიერთებას – მისი თქმით, ეს „თავის მოტყუებაა“ და საქართველოს მოქალაქეებისთვის სანქციების დაწესების ტოლფასია. „გიჟები ხომ არ ვართ, ეს გავაკეთოთ?!“, – იკითხა მან.
სიმონიანმა თავის ტელეგრამ-არხში მდინარაძის ეს განცხადება გააზიარა და „გასაოცრად ადეკვატურად“ შეაფასა საქართველოს ქცევა. პროპაგანდისტმა ასევე სურვილი გამოთქვა, რომ იმავენაირად სომხეთიც იქცეოდეს – აქამდე მოსკოვის მოკავშირე, რომელთანაც ბოლო დროს რუსეთს ურთიერთობები დაეძაბა. სიმონიანი პირველად არ ადარებს საქართველოსა და სომხეთის მთავრობების პოზიციებს.
სიმონიანის გარდა, საქართველოს პოზიციას ხშირად აქებენ რუსეთის ხელისუფლების წარმომადგენლებიც.
