აზერბაიჯანში ონლაინ გამოცემა Abzas Media-ს დირექტორის, ულვი ჰასანლის 20 ნოემბერს გატაცება/დაკავების შემდეგ, დღეს, 21 ნოემბერს გამოცემის რედაქტორი, სევინჯ ვაგიფგიზიც დააკავეს. პოლიციამ ევროპიდან სტამბოლის გავლით მომავალი სევინჟ ვაგიფიზი ბაქოს აეროპორტშივე დააპატიმრა.

სევინჯ ვაგიფგიზის გუშინდელი განცხადებით, მან არ გამორიცხა, რომ  აეროპორტის გზაზე გამოცემის დირექტორის გაუჩინარება და სავარაუდო დაპატიმრება უკავშირდებოდა გამოცემის ჟურნალისტურ გამოძიებას აზერბაიჯანელი მაღალჩნოსნების ოჯახის წევრების ბიზნესებზე. მოგვიანებით, Abzas Media-ს რედაქციაში ჩხრეკა დაიწყო. გამოცემის დირექტორი კი “რედაქციაში ნაპოვნი 40 ათასი ევროს კონტრაბანდაში” დაადანაშაულეს.

კავკაზსკი უზელის ცნობით, სევინჯ ვაგიფგიზი წარსულში თანამშრომლობდა Meydan.Tv-სთანაც, სადაც წერდა ადამიანის უფლებებზე, პოლიტპატიმრებზე და სხვა სოციალურ პრობლემებზე. ამასთან, ის თანამშრომლობდა OCCRP-თან (Organised Crime and Corruption Reporting Project), სადაც აზერბაიჯანში კორუფციის საკითხებზე რამდენიმე ჟურნალისტური გამოძიება გამოაქვეყნა.

აზერბაიჯანის ხელისუფლება უკანასკნელი წლების განმავლობაში რეჟიმისადმი კრიტიკულად განწყობილ პოლიტიკოსებს, აქტივისტებს, უფლებამდამცველებსა და ჟურნალისტებს აკავებს და ასამართლებს სხვადასხვა, მათ შორის, ყველაზე ხშირად, ნარკოტიკების მოხმარების ან გადასახადების დამალვის ბრალდებით . ადამიანის უფლებების დაცვის კუთხით, სამხრეთ კავკასიის ქვეყნებს შორის ყველაზე ცუდი მდგომარეობა აზერბაიჯანშია, რასაც ასევე მოწმობს საერთაშორისო ანგარიშები.