„ერთიანი ნაციონალური მოძრაობის“ თავმჯდომარე ლევან ხაბეიშვილი აშშ-ის საერთაშორისო რესპუბლიკური ინსტიტუტის (IRI) ბოლო კვლევის შედეგებთან დაკავშირებით განცხადებას ავრცელებს და მიიჩნევს, რომ „ქართული ოცნების“ დამარცხება შესაძლებელია, თუ პატარა, პროდასავლური ოპოზიცია სტრატეგიულად სწორად მოიქცევა:
„ყველა კვლევა და გამოკითხვა ადასტურებს, რომ რუსული პარტიის დამარცხება, და თან დიდი ანგარიშით, შესაძლებელია, თუ პატარა, პროდასავლური ოპოზიცია სტრატეგიულად სწორად მოიქცევა. ერთიანი ნაციონალური მოძრაობა პასუხისმგებლიანი, ყველაზე დიდი ევროპული პარტიაა საქართველოში და, შესაბამისად, გავაკეთეთ გამარჯვების კოალიცია გიორგი ვაშაძე – სტრატეგია აღმაშენებელთან, რომლის მხარდაჭერა და ხმები ყველაზე იოლად ერწყმის ჩვენს პარტიას – ჩვენ ვიბრძოლებთ გამარჯვებისთვის, მხოლოდ პირველი ადგილისთვის!
IRI – ის ეს კვლევაც ადასტურებს, რომ ჩვენ 4 – ჯერ და რიგ შემთხვევაში 8 – ჯერ უფრო მეტი მხარდაჭერა გვაქვს. შესაბამისად, უმჯობესია, ჩვენზე შფოთვებს და ნერვიულობას მორჩეს ყველა. კარგად უნდა გვესმოდეს, რომ ვერანაირი პროცესი თუ ცალკე აღებული კონკრეტული ადამიანის(ების) ვიწრო, პირადი წუწუნი და მოთქმა ვერ დააზიანებს მთავარ მიზანს, იდეასა და ღირებულებებს“, — ამბობს ხაბეიშვილი.
ხაბეიშვილის თქმით, მიხეილ სააკაშვილის პარტია მის გარშემო გაერთიანდება და იქნება მთავარი ინსტრუმენტი და შესაძლებლობა რუსი ოლიგარქის დამარცხების გზაზე:
„ყველა პროდასავლურმა პარტიამ უნდა შეძლოს პრაგმატული ნაბიჯების გადადგმა, რომელიც გარდაუვლად დაამარცხებს ივანიშვილს და მის რეჟიმს. ერთადერთი გამოსავალია, ყველა ესაუბროს მის ამომრჩეველს, მოახდინეთ თქვენი მხარდამჭერების დარწმუნება, გაერთიანება, რომ გადალახოთ 5 % – იანი ბარიერი და არანაირი შანსი რუსულ პარტიას არ დარჩება”, – წერს ლევან ხაბეიშვილი სოციალურ ქსელში.
აშშ-ის საერთაშორისო რესპუბლიკური ინსტიტუტის [IRI] კვლევის თანახმად, გამოკითხულთა 25% ამბობს, რომ ხვალ არჩევნები რომ იყოს, ხმას მმართველ გუნდს, „ქართულ ოცნებას“ მისცემდა. მარტის კვლევასთან შედარებით, „ოცნების“ რეიტინგი 6%-თაა გაზრდილი.
„ნაციონალური მოძრაობა“ მეორე ადგილზეა, 13%-ით. მათი რეიტინგის ცვლილება ცდომილების ზღვრის ფარგლებშია. გიორგი გახარიას „საქართველოსთვის“ – მესამეზე, 4%-ით.
