“ინფორმაცია აფხაზეთის ტერიტორიაზე დივერსანტების შეჭრასთან დაკავშირებით ამ ეტაპზე არ დადასტურდა”, –  ამის შესახებ აფხაზეთის დე ფაქტო შსს-ში რუსულ სპუტნიკ-აფხაზიას განუცხადეს.

იქამდე, 8 ნოემბერს ღამით, აფხაზეთის დე ფაქტო შს მინისტრმა რობერტ კიუტმა განაცხადა, რომ “ძალოვანი სტრუქტურები გულრიფშის რაიონში შეიარაღებულ დაჯგუფებას ეძებენ”. აფხაზურ ტელეგრამ არხებზე გავრცელებული ინფორმაციით, საუბარი იყო “საქართველოდან შეჭრილ დივერსანტებზე”, რამაც ადგილობრივ მოსახლეობაში ვნებათაღელვა გამოიწვია.

მისივე განცხადებით, “შვიდი შეიარაღებული ადამიანი ადგილობრივმა მონადირეებმა შენიშნეს”.

“ისინი შეიარაღებული იყვნენ უცხო ქვეყნის შეიარაღებით, სავარაუდოდ, ავტომატებით М-4, ჩაცმული შავ ფორმებში, ნიღბებში, თავსაბურავებში და კარგად ეკიპირებული. მათ ასევე ჰქონდათ კოპტერი, რომელიც გარშემო უფრენდა სოფელს. სოხუმში ყველა შესასვლელი გზა გადაკეტილია”, – აცხადებდა დე ფაქტო მინისტრი 8 ნოემბერს.