ადამიანი, რომლის ცხედარიც გუშინ თბილისში, დადიანის ქუჩაზე მდებარე სარდაფში იპოვეს, მოკლული აღმოჩნდა. შინაგან საქმეთა სამინისტროს განცხადებით, განზრახ მკვლელობის ბრალდებით 1979 წელს დაბადებული ა.შ. დააკავეს.

უწყების განცხადებით, გამოძიებით დადგინდა, რომ მიმდინარე წლის 2 ოქტომბერს ბრალდებულმა თბილისში, დადიანის ქუჩაზე მდებარე სარდაფში, ურთიერთშელაპარაკების ნიადაგზე, ცივი იარაღისა და ბლაგვი საგნის გამოყენებით სასიკვდილო ჭრილობა მიაყენა მეგობარს – 1981 წელს დაბადებულ ლ.ა.-ს., რის შემდგომაც ადგილიდან მიიმალა.

„პოლიციამ ჩატარებული საგამოძიებო მოქმედებების შედეგად ბრალდებული თბილისში დააკავა. დანაშაულის ჩადენის იარაღები ნივთმტკიცებადაა ამოღებული. განზრახ მკვლელობის ფაქტზე გამოძიება საქართველოს სისხლის სამართლის კოდექსის 108-ე მუხლით მიმდინარეობს დანაშაული 10-დან 15 წლამდე ვადით თავისუფლების აღკვეთას ითვალისწინებს“, — ნათქვამია შსს-ის მიერ გავრცელებულ განცხადებაში.