პროკურატურამ უმწეო მდგომარეობაში მყოფი ოჯახის წევრის მიმართ ჩადენილი მკვლელობის საქმეზე ერთ პირს ბრალდება წარუდგინა.

საუბარია 26 სექტემბერს გორის რაიონის სოფელ ქორდში მომხდარ ფაქტზე, როცა, გამოძიების თანახმად, ბრალდებულმა მძინარე მამას სანადირო თოფიდან ესროლა.

“მიღებული დაზიანების შედეგად დაზარალებული ადგილზე გარდაიცვალა”, — დასძენს პროკურატურა.

სამართალდამცველებმა ბრალდებული 28 სექტემბერს დააკავეს. მას ბრალდება სსკ-ის 11 პრიმა-109-ე მუხლის „ე“ და „კ“ ქვეპუნქტებით წარედგინა. ეს გულისხმობს განზრახ მკვლელობას დამამძიმებელ გარემოებებში, დამნაშავისთვის წინასწარი შეცნობით, უმწეო მდგომარეობაში მყოფი ოჯახის წევრის მიმართ.

ბრალდებულს 16-დან 20 წლამდე ან უვადო თავისუფლების აღკვეთა ემუქრება.