სამ აგვისტოს, დილით, რუსულმა ძალებმა არტილერიული დარტყმები განახორციელეს ხერსონზე. უკრაინული მხარის ცნობით, ჭურვები მოხვდა ეკლესიასა და ტროლეიბუსს.
ხერსონის ადმინისტრაციის წარმომადგენლის, ალექსანდრ პროკუდინის განცხადებით, დაჭრილია ტროლეიბუსის სამი მგზავრი – დაბომბვისას საზოგადოებრივი ტრანსპორტი ეკლესიასთან გადაადგილდებოდა.
დაშავდნენ 39 წლის მამაკაცი და 53 წლის ქალი, ხოლო 74 წლის მამაკაცი დაიჭრა გულ-მკერდის არეში. მან აგრეთვე მიიღო თავის დახურული ტრავმა. „ექიმები მისი სიცოცხლისთვის იბრძვიან“, – აღნიშნავს პროკუდინი.
გარდა ამისა, ეკლესიაში დაბომბვის შედეგად გაჩენილი ხანძარის ქრობისას შენობაზე მეორე დარტყმაც განხორციელდა. დაშავდა სამაშველო სამსახურის ოთხი თანამშრომელი.