აშშ-ის სახელმწიფო დეპარტამენტის განცხადებით, საქართველოს ეროვნული ბანკი და ქვეყნის ფინანსური ინსტიტუტები სრულად იცავენ აშშ-ისა და სხვა ქვეყნების სანქციებს რუსეთის წინააღმდეგ.
ამის შესახებ ნათქვამია სახდეპის ანგარიშში სხვადასხვა ქვეყანაში არსებული საინვესტიციო კლიმატის შესახებ.
„საქართველოს ეროვნული ბანკი და ქართული ფინანსური ინსტიტუტები სრულად იცავენ აშშ-ისა და სხვების დაწესებულ ფინანსურ სანქციებს რუსეთის ფედერაციის წინააღმდეგ. საერთაშორისო სანქციების დაცვა სისტემატურად მოწმდება ადგილზე, ფინანსური ინსტიტუტების შემოწმებისას“, – ვკითხულობთ დოკუმენტში.
უკრაინაში სრულმასშტაბიანი შეჭრის შემდეგ, დასავლეთის ქვეყნებმა რუსეთს ფინანსური და ეკონომიკური სანქციები დაუწესეს. საქართველო არ შეუერთდა ეკონომიკურ, თუმცა იცავს ფინანსურ სანქციებს – მაგალითად, საქართველოში ვერ ოპერირებენ სანქცირებული რუსული ბანკები თუ სხვა ფინანსური ინსტიტუტები.