„არანაირი ინფორმაცია შსს-ს ჩემთვის არ მოუწოდებია და სიმართლეც გითხრათ, ეს მუხლი არის სრული აბსურდი და ამაზე საუბარში დროის დახარჯვა ზუსტად ისეთ სისულელედ მიმაჩნია, როგორიც თავად ეს მუხლია.“ – განაცხადა „ერთიანი ნაციონალური მოძრაობის“ ახალგაზრდული ორგანიზაციის წევრმა, ლუკა შველიძემ, რომელსაც გუშინ, 17 ივნისს თსუ-ში ინციდენტისას სცემეს.
მის კომენტარს ენმ-ს პრესსამსახური ავრცელებს.
ლუკა შველიძე გუშინ მეორე ინციდენტში მოხვდა. ხეჩინაშვილის კლინიკაში, სადაც ის თსუ-ში დაპირისპირების შემდეგ გადაიყვანეს, როგორც თავად ამბობს, მას “შეიარაღებულმა პირებმა” მიაკითხეს.
ლუკა შველიძის ოჯახმა ადგილზე პოლიცია გამოიძახა. მათ მამაკაცი მანქანაში ჩასვეს და წაიყვანეს, თუმცა უცნობია, დააკავეს ის თუ ადგილიდან გაარიდეს. შინაგან საქმეთა სამინისტროში კომენტარს არ აკეთებენ.
მოგვიანებით გაირკვა, რომ ზემოხსენებული შეიარაღებული პირი კრიმინალური პოლიციის თანამშრომელი იყო და გამოძიება სისხლის სამართლის კოდექსის 353 – ე მუხლით დაიწყო, რაც პოლიციელის მიმართ წინააღმდეგობას, მუქარას ან ძალადობას ნიშნავს.
“დღეს ვარ დაზარალებულის სტატუსით მოსული აქ [გამოკითხვაზე], უნდა მივცე ჩვენება იმასთან დაკავშირებით, რაც მოხდა ჯავახიშვილის უნივერსიტეტში, როგორ გვცემდნენ სტუდენტებს და როგორ ცდილობდნენ ჩვენთვის მოეყენებინათ ფიზიკური დაზიანება. რაც შეეხება იმ მუხლს, მე ვფიქრობ, რომ სრული აბსურდი არის, არანაირად არ ვეთანხმები და არანაირი ინფორმაცია არ მოუწოდებია შსს-ს ჩემთვის, არც ვიცი და სიმართლე გითხრათ აბსურდული მუხლი მგონია და არ ვაპირებ ამაზე საუბარში დრო დავხარჯო.
როდესაც მივედით, ბანერების გაშლა გვინდოდა მდუმარედ, მშვიდობიანი პროტესტის გამოხატვა, ვიყავით რამდენიმე ადამიანი, დაგვხვდა ვიღაც წვერიანი პიროვნება, ჩვენზე ასაკით დიდი პიროვნება, შემდეგ დარეკა, რომ აქ რაღაც აქციას აწყობენ, გამოვიდა 20-მდე ადამიანი და პირდაპირი მოწოდება იყო ასეთი, რომ ამას ურტყით და დამესივნენ მე, მომაქციეს წრეში და დაიწყეს ჩემი ცემა, ვინც ცდილობდა, რომ ხელი შეეშალათ და გამოვეყვანე, მათ ხელს კრავდნენ და კიბეებზე აგორებდნენ, რაც კადრებშიც ძალიან კარგად ჩანს.“ – განაცხადა „ერთიანი ნაციონალური მოძრაობის“ ახალგაზრდული ორგანიზაციის წევრმა, ლუკა შველიძემ.
„ჩვენ დღეს მოვედით გამოკითხვაზე და სრულიად საქართველომ ნახა თუ როგორ იძალადა ლუკაზე ჯგუფმა და ეს მოძალადეები, როგორც ჩემთვის ცნობილია ამ წუთებამდე არ არიან გამოკითხულები. ჩვენ როდესაც ყველანაირ ამომწურავ ინფორმაციას მივაწოდებთ გამოძიებას, გამოძიებამ კეთილი უნდა ინებოს და დააკავოს აღნიშნული მოძალადეები და პროკურატურამ კი მათ ბრალი უნდა წაუყენოს. ჩვენ დღეს ვხედავთ, რომ საზოგადოებაში არის დაუსჯელობის სინდრომი, როდესაც მოძალადეებს არ აკავებენ ეს ყველაფერი არის მწვანე შუქი მოძალადეებისთვის და მე ბატონ შოთაძეს ვთხოვ, მთავარ პროკურორს, ნუ გადაიქცა მთავარ კრიმინალად. მან უნდა წაუყენოს კრიმინალებს ბრალი და შეასრულოს თავისი უფლებამოსილება .
მე შემიძლია პირდაპირ ვთქვა, რომ აღნიშნულ მუხლთან დაკავშირებით ლუკას არავინ დაუკავშირდა, მაგრამ მე შემიძლია შევაფასო სამართლებრივად ,როდესაც პოლიციის თანამშრომელზე არის ეჭვი, რომ იგი არის ნასვამი, როდესაც აღნიშნული პოლიციის თანამშრომელი არ წარმოადგენს სამსახურებრივ მოწმობას, რომელ პოლიციელსაც აქვს იარაღი და ის არ არის დამალული, როდესაც მას სამოქალაქო ფორმა აცვია, ის არ ასრულებს ესე იგი თავის მოვალეობას, ის არის კანონდამრღვევი და 353 – ე მუხლი ვერ იარსებებს, როდესაც პოლიცია აქეთ არღვევს კანონს.“ – განაცხადა „ერთიანი ნაციონალური მოძრაობის“ ადვოკატმა, ლაშა ტყეშელაძემ.
