ჭიათურაში „ჯორჯიან მანგანეზის“ დასაქმებული მაღაროელები კომპანიას მათი მოთხოვნების დასაკმაყოფილებლად ვადას დღის ბოლომდე აძლევენ, წინააღმდეგ შემთხვევაში კი შიმშილობის დაწყებას გეგმავენ.

როგორც ერთ-ერთი მაღაროელი „ნეტგაზეთთან“ საუბრისას აცხადებს, თუ კომპანია დათმობაზე არ წამოვა, დღეს საღამოს შიმშილობას პირველ ეტაპზე 12 ადამიანი დაიწყებს:

„ჯერჯერობით 12 ადამიანი გეგმავს ამ საღამოდან შიმშილობის დაწყებას. შიმშილს მალე მთელი ქალაქი დაიწყებს, მარტო ეს მოშიმშილეები კი არა, ფული აღარავის ექნება, შიმშილობა არ არის?!“, — ამბობს დასაქმებული ჩვენთან საუბრისას.

ჭიათურაში „ჯორჯიან მანქანეზის“ მაღაროებში დასაქმებულები უკვე მეექვსე დღეა საპროტესტო რეჟიმში არიან და სამუშაო პირობების გაუმჯობესებას ითხოვენ. 11 ივნისს ისინი კომპანიის წარმომადგენლებს შეხვდნენ, თუმცა, როგორც მეტალურგიული, სამთო და ქიმიური მრეწველობის მუშათა პროფკავშირის პრეზიდენტის მოვალეობის შემსრულებელმა უთხრა „ნეტგაზეთს“, შეხვედრაზე შეთანხმება ვერ შედგა.

თეიმურაზ სურამელაშვილის განცხადებით, დღევანდელ შეხვედრაზე კომპანიას დასაქმებულებისთვის ახალი პირობები არ შეუთავაზებია.

“დამსაქმებელმა გააცნო პირობები, რომლის თანახმადაც ისევ 8-საათიან ცვლას სთავაზობდა, რაც მიუღებელია დასაქმებულებისთვის. შეთანხმება ვერ შედგა ამ შეხვედრაზე”, — უთხრა ნეტგაზეთს სურამელაშვილმა.

ნეტგაზეთი დღევანდელი შეხვედრის თაობაზე “ჯორჯიან მანგანეზსაც” დაუკავშირდა, სადაც გვითხრეს, რომ დასაქმებულებთან “კონსტრუქციული დიალოგის რეჟიმი გრძელდება”:

“დღეს გაიმართა მორიგი მოლაპარაკება, კომპანიამ გააცნო პირობები, ნაწილისთვის მისაღებია, ნაწილისთვის არა, შესაბამისად, გრძელდება მოლაპარაკებები”, — განმარტეს კომპანიაში.

მაღაროელების პროტესტის მიზეზია “ჯორჯიან მანგანეზის” მიერ მიმდინარე წლის თებერვალში სამუშაო გრაფიკის ცვლილება. პროტესტის მონაწილეები ასევე ითხოვენ ღირსეულ ანაზღაურებას. სურამელაშვილის განმარტებით, დასაქმებულები ითხოვენ, რომ ხელფასი მოპოვებული ნედლეულის ტონების მიხედვით გადაუხადონ.

გარდა ამისა ჭიათურის მაღაროში დასაქმებულების მოთხოვნაა: შრომის უსაფრთხოების დაცვა, აღჭურვილობისა და სპეცტანსაცმლის შეცვლა, სანგრების განიავება, სადაზღვევო კომპანიის შეცვლა, საპენსიო დანაზოგის გაუქმება, საშემოსავლოს შემცირება, კუთვნილი შვებულებით სარგებლობა და ქალაქის ეკოლოგიური საკითხის მოწესრიგება.

სურამელაშვილის თქმით, ამ დროისთვის მაღაროების უმეტესი ნაწილი არ მუშაობს:

“ძირითადი მოთხოვნა არის, რომ სამუშაო ცვლების გრაფიკი არ შეიცვალოს. როდესაც ეკონომიკური კრიზისი დაუდგა დამსაქმებელს, პროფესიულ კავშირებთან გაფორმებული კოლექტიური ხელშეკრულების ფარგლებში დამსაქმებელმა ვალდებულება იკისრა და [გაჩერებული საწარმოს პირობებში] დასაქმებულებს ხელფასის 60%-ს მაინც უხდიდა.

ახლა, როცა დასაქმებულთა ნაწილი სამუშაოდ გამოიძახეს, დამსაქმებელს უნდა, რომ დასაქმებულებმა არა 12-საათიანი გრაფიკით, არამედ 8-საათიანი გრაფიკით იმუშაონ მაღაროზე“, – ამბობს თეიმურაზ სურამელაშვილი.