ახალი ამბები

„ოქტომბერში მთავრობა წამლის მწარმოებელს დაუკავშირდა, სიაც გაგზავნილი იყო“ — გოჩიაშვილი

25 აპრილი, 2023 • 2805
„ოქტომბერში მთავრობა წამლის მწარმოებელს დაუკავშირდა, სიაც გაგზავნილი იყო“ — გოჩიაშვილი

აქონდროპლაზიის დიაგნოზის მქონე ბავშვის დედა მაკუნა გოჩიაშვილი „მთავარ არხთან“ საუბრისას აცხადებს, რომ გასული წლის ნოემბერში მშობლებს მთავრობასთან აქტიური კომუნიკაცია ჰქონდათ ბავშვებისთვის მედიკამენტის დაფინანსების თაობაზე.

კერძოდ, გოჩიაშვილის თქმით, საქართველოს მთავრობა პრეპარატის მწარმოებელ კომპანია „ბიომარინსაც“ დაუკავშირდა, რომელიც საქართველოსთვის წამლის შეღავათიან ფასში მიწოდებაზე იყო თანახმა. დედის თქმით, „ბიომარინს“ იმ ბავშვების სიაც გაეგზავნა, რომლებსაც აღნიშნული პრეპარატი სჭირდებოდათ, თუმცა საქართველოს მთავრობამ ბოლო წამს უკან დაიხია და საბოლოოდ მშობლებს მედიკამენტის შესყიდვაზე უარი ბუნდოვანი მიზეზით უთხრა:

„ჩვენ წლი-ნახევრის წინ, როდესაც ამ წამალმა ლიცენზია მიიღო, მშობლები მოვბილიზდით, შევიკრიბეთ, ყველანაირი სახის ინფორმაცია მივაწოდეთ, დოკუმენტები მივაწოდეთ. მათი გასაკეთებელი საქმეც ჩვენს თავზე ავიღეთ, თუნდაც აღრიცხვას რაც შეეხება, სად რამდენი ბავშვია, რომელ რეგიონში რამდენია… ყველა სახის ინფორმაცია მივაწოდეთ, ექიმების დასტური გვქონდა, გენეტიკოსების დასტური გვქონდა, რომლებიც ადასტურებდნენ, რომ ეს მედიკამენტი შესაფერისია ბავშვებისთვის.

შემოდგომაზე უკვე იყო დანაპირები. მთავრობას ჰქონდა კომუნიკაცია „ბიომარინთან“, რომელიც ამ პრეპარატს აწარმოებს და კომუნიკაცია იქამდეც კი მივიდა, რომ დაუკლო თანხა „ბიომარინმა“ ქართველ ბავშვებს და შეღავათიან ფასში შესთავაზა შესყიდვა, სიაც გაგზავნილი იყო. ბოლო მომენტში დაიხია მთავრობამ უკან და უპასუხოდ დაგვტოვა. არც კი ჩანდა, არც არა. ნოემბრისთვის უნდა გამოცხადებულიყო რა გადაწყვეტილება მიიღეს საბოლოოდ და ამ დროს არაფერი ისმოდა, თვეები გვაწვალეს და საბოლოო ჯამში თქვეს ბუნდოვანი სხვადასხვა მიზეზებით, ჯერ ფული არ გვილაგია აქო, მერე გაიაროს მეოთხე ფაზაცო, რომელიც აბსოლუტურად არ არის საჭირო გაიაროს“, — ამბობს მაკუნა გოჩიაშვილი.

აქონდროპლაზიის დიაგნოზის მქონე ბავშვების მშობლები უკვე რამდენიმე თვეა საპროტესტო აქციებს მართავენ და საქართველოში მათი შვილებისთვის საჭირო მედიკამენტის შემოტანასა და სახელმწიფოს დაფინანსებას ითხოვენ. ამ მოთხოვნით დედები უკვე ერთი კვირაა მთავრობის ადმინისტრაციის შენობასთან 24- საათიან რეჟიმში იმყოფებიან და პრემიერ-მინისტრ ირაკლი ღარიბაშვილთან შეხვედრას ითხოვენ.

მშობლების მოთხოვნის საპასუხოდ, ირაკლი ღარიბაშვილმა 24 აპრილის მთავრობის სხდომაზე განაცხადა, რომ წამლის დაფინანსების პრობლემა ქვეყანაში არ დგას, რადგან საუბარია დაახლოებით 10 მილიონზე. თუმცა მთავრობა ამ ნაბიჯს ჯერ არ გადადგამს, რადგან მას პრეპარატის შემოსატანად დამატებითი სამედიცინო მტკიცებულებები სჭირდება.

საუბარია პრეპარატ Voxzogo-ს (აქტიური ნივთიერება – ვიზოდორიტით), რომელსაც 2021 წელს აშშ-ის წამლისა და საკვების ადმინისტრაციამ (FDA), ასევე ევროპის წამლის სააგენტომ (EMA) ავტორიზაცია მისცა. ეს პრეპარატი პირველია, რომელიც გამოიყენება სინდრომისა და მისგან გამოწვეული სიმპტომების სამკურნალოდ. მშობლები ამბობენ, რომ მისი მიღება ეფექტურია მხოლოდ გარკვეულ დრომდე, კერძოდ – 18 წლამდე.

მასალების გადაბეჭდვის წესი