რა შეიცვლება “ფორმულაში” კეზერაშვილის წილის შემცირებით — დირექტორის განმარტება

ტელეკომპანია “ფორმულას” გენერალური დირექტორის, ზუკა გუმბარიძის განმარტებით, დავით კეზერაშვილის კუთვნილი 51%-დან 25% “ფორმულას” თანამშრომლებს გადაეცემა, რომლებიც შექმნიან გარკვეულ ორგანიზაციას, მისი თავმჯდომარეს კი ტელეკომპანიის ბორდში აირჩევენ.

ამის შესახებ “ფორმულას” ხელმძღვანელებმა დღეს, 18 აპრილს, ტელეკომპანიის დამფუძნებლის, დავით კეზერაშვილის წერილის შემდეგ ისაუბრეს.

ზუკა გუმბარიძის თქმით, ამ ეტაპზე არ აქვთ გადაწყვეტილი, ვინ იქნებიან “ფორმულას” ის თანამშრომლები, რომლებიც წილების გადაცემის შემდეგ ტელეარხის თანამფლობელები გახდებიან, თუმცა, მისი განმარტებით, მათ შორის იქნებიან როგორც ტელეკომპანიის ცნობილი სახეები, ასევე სხვა დასაქმებულებიც.

“25% გადაეცემა “ფორმულელებს”. ესენი იქნებიან ადამიანები, რომლებსაც კარგად იცნობთ ეკრანებიდან და ასევე ადამიანები, რომლებიც კადრს მიღმა დგანან, თუმცა უზარმაზარ როლს თამაშობენ, რომ ფორმულა იყოს ეთერში და მაუწყებლობდეს  იმ ფრომით, რა ფორმითაც მაუწყებლობს…

პროცესი იქნება ინკლუზიური. საბოლოოდ, დამფუძნებელი გახდება ბევრი ადამიანი. ეს ადამიანები შექმნიან გარკვეულ ორგანიზაციას, სადაც აირჩევენ თავმჯდომარეს, იმ ადამიანს, ვინც წარმოდგენილი იქნება “ფორმულას” მმართველ ორგანოში, ე.წ. ბორდში, და “ფორმულელების” პოზიცია ყველა დონეზე იქნება გაჟღერებული და გათვალისწინებული”, – განაცხადა მან.

მისი თქმით, კეზერაშვილმა საკონტროლო პაკეტის ტელეკომპანიის თანამშრომლებისთვის გადაცემის გადაწყვეტილება “ფორმულას” ხელმძღვანელებთან კონსულტაციის შედეგად მიიღო.

გუმბარიძის განმარტებით, აღნიშნული ნაბიჯი შექმნის დამატებით იურიდიულ ჩარჩოს, რომ რომელიმე ერთი დამფუძნებლის მხრიდან სარედაქციო პოლიტიკაში ერთპიროვნული ჩარევის შესაძლებლობაც კი გამოირიცხოს:

“მთავარი, რასაც ჩვენ, როგორც არხი მივიღებთ, იქნება ის, რომ დღეიდან ვერც ერთი ცალი დამფუძნებელი ვეღარ მიიღებს ერთპიროვნულ გადაწყვეტილებას არხზე მიმდინარე პროცესებთან დაკავშირებით.

მიუხედავად იმისა, რომ ფორმულას აქამდეც ჰქონდა სარედაქციო პოლიტიკა, ეს პრეცედენტი კიდევ ერთ დამატებით იურიდიულ გარანტიას შექმნის იმისა, რომ არხის სარედაქციო პოლიტიკა იქნება ხელშეუხებელი და მას კვლავაც განსაზღვრავენ ის ადამიანები, ვინც უნდა განსაზღვრავდეს ამ სარედაქციო პოლიტიკას”, – განმარტა გუმბარიძემ.

რაც შეეხება კეზერაშვილს, გუმბარიძის თქმით, იქიდან გამომდინარე, რომ “ფორმულა”, როგორც ბიზნესი, თვითკმარი არ არის, მის დაფინანსებას დავით კეზერაშვილი კვლავ განაგრძობს.

თავდაცვის ყოფილმა მინისტრმა და ტელეკომპანია “ფორმულას” დამფუძნებელმა, დავით კეზერაშვილმა დღეს განაცხადა, რომ უარს ამბობს “ფორმულას” საკონტროლო პაკეტის ფლობაზე და საკუთარი წილის ნახევარს ტელეკომპანიის თანამშრომლებს გადასცემს. აღნიშნულ გადაწყვეტილებას წინ უძღოვდა BBC-ის ჟურნალისტური გამოძიება, რომლის თანახმად, კეზერაშვილი დაკავშირებულია „ასობით სხვადასხვა საინვესტიციო ბრენდის გლობალურ თაღლითურ ქსელთან“, რომელმაც კლიენტთა მოტყუების გზით მილიარდ დოლარზე მეტი გამოიმუშავა.

კეზერაშვილი უარყოფს ჟურნალისტურ გამოძიებაში გახმიანებულ ბრალდებებს და ამბობს, რომ ყველაფერს გააკეთებს იმისთვის, რათა ტელეკომპანია “ფორმულას” თანამშრომლები დარწმუნებული იყვნენ, რომ მის მიმართ გამოთქმული ბრალდებები ცილისმწამებლურია, დაშვებები კი – უსაფუძვლო.

ნახეთ ვრცლად:

• უარს ვამბობ „ფორმულას“ საკონტროლო პაკეტზე – კეზერაშვილი
• კეზერაშვილი გლობალური თაღლითური ქსელის უკან დგას – BBC-ის გამოძიება