საავტომობილო გზების დეპარტამენტის განცხადებით, რიკოთის უღელტეხილზე ავტოტრანსპორტის მოძრაობა აღდგება სამუშაოების დასრულებისა და სპეციალისტების მხრიდან გზის უსაფრთხოების შესახებ შესაბამისი რეკომენდაციების მიღებისთანავე.

„თბილისი–სენაკი–ლესელიძის საავტომობილო გზის 147-ე კილომეტრთან (ჩუმათელეთი-ხევის მონაკვეთზე), სპეციალისტების მხრიდან მუდმივი მონიტორინგის პირობებში, გამოვლინდა ადგილი, საიდანაც შეიძლებოდა განვითარებულიყო ქვათაცვენა

ავტოტრანსპორტის მოძრაობის უსაფრთხოებიდან გამომდინარე, საავტომობილო გზების დეპარტამენტმა მიიღო გადაწყვეტილება, დროებით შეეჩერებინა რიკოთის უღელტეხილზე მოძრაობა. ფერდის არამყარი მასის ჩამოშლის პროვოცირების შედეგად ჩამოსულია მიწის მასა. ამ ეტაპზე მიმდინარეობს გზის წმენდის და გაგანიერების ინტენსიური სამუშაოები

ამ დროისათვის საერთაშორისო მნიშვნელობის თბილისი–სენაკი–ლესელიძის საავტომობილო გზის კმ114-კმ194 მონაკვეთზე (ახალსოფლის სატრანსპორტო კვანძი-ზესტაფონი) ყველა სახის ავტოტრანსპორტის მოძრაობა დროებით აკრძალულია“, – ნათქვამია საავტომობილო გზების დეპარტამენტის განცხადებაში.

რიკოთის საუღელტეხილო მონაკვეთზე ავტოტრანსპორტის მოძრაობის აკრძალვის პერიოდში, მსუბუქი ტრანსპორტის მოძრაობა განხორციელდება შიდასახელმწიფოებრივი მნიშვნელობის გომი-საჩხერე-ჭიათურა-ზესტაფონის საავტომობილო გზის გავლით. ხოლო მისაბმელიანი და ნახევრად მისაბმელიანი ავტოტრანსპორტის მოძრაობა აკრძალულია.

რიკოთის მონაკვეთი 30 მარტის შემდეგ იყო ჩაკეტილი და მოძრაობა გომი-საჩხერე-ჭიათურა-ზესტაფონის საავტომობილო გზის გავლით ხორციელდებოდა, რომლის საფარიც ასევე დაზიანებულია. რიკოთზე მოძრაობა 11 აპრილს აღდგა, დღეს კი კვლავ აიკრძალა.