ტელეკომპანია „ფორმულას“ ჟურნალისტს, სოფიო გოზალაშვილს პარლამენტის აკრედიტაცია 1 თვით შეუჩერეს. ინფორმაციას ამის შესახებ „ფორმულას“ პროდიუსერი გიორგი ლაფერაშვილი ავრცელებს.
წერილში, რომელიც ჟურნალისტმა პარლამენტიდან მიიღო, ნათქვამია, რომ სოფიო გოზალაშვილმა დაარღვია პარლამენტის თავმჯდომარის ბრძანების მე-15 მუხლის მე-2 პუნქტი, რომელიც ჟურნალისტს ავალდებულებს, არ ჩაწეროს ინტერვიუ პარლამენტის წევრთან, აპარატის თანამშრომელთან ან მოწვეულ პირთან, თუკი რესპონდენტი ამაზე უარს აცხადებს:
„2023 წლის 31 მარტს თქვენ დაარღვიეთ ზემოაღნიშნული ქვეპუნქტის მოთხოვნა, რაც დასტურდება 1 აპრილს გადაცემა „შაბათის ფორმულაში“ გაშვებული სიუჟეტით. აღნიშნულიდან გამომდინარე, „საქართველოს პარლამენტში მასობრივი ინფორმაციის საშუალებათა წარმომადგენლების აკრედიტაციის წესის დამტკიცების თაობაზე“ საქართველოს პარლამენტის თავმჯდომარის 2023 წლის 6 თებერვლის ბრძანებით დამტკიცებული „საქართველოს პარლამენტში მასობრივი ინფორმაციის საშუალებათა წარმომადგენლების აკრედიტაციის წესის“ მე-13 მუხლის პირველი პუნქტის შესაბამისად, გაცნობებთ, რომ თქვენ შეგიჩერდათ ჟურნალისტის აკრედიტაცია 1 თვის ვადით, 2023 წლის 3 მაისის ჩათვლით“, — აცნობეს ჟურნალისტს პარლამენტიდან.
სიუჟეტი, რომლის მომზადების გამოც ჟურნალისტს აკრედიტაცია შეუჩერეს, შალვა რამიშვილის მიერ ქალების შევიწროებას ეხებოდა. ჟურნალისტს დეპუტატებისგან აინტერესებდა, რატომ უჭერენ ისინი მხარს რამიშვილს.