„მოქალაქეების“ ლიდერი და სახალხო დამცველობის კანდიდატი ლევან იოსელიანი პატიმრობაში მყოფი ნიკა გვარამიას კითხვის საპასუხოდ ამბობს, რომ მისი პატიმრობა პოლიტიკურად არის ნაკარნახევი.
მას შემდეგ, რაც საპარლამენტო ოპოზიციის ნაწილმა განაცხადა, რომ იოსელიანის კანდიდატურას მხარს დაუჭერდა, მას კითხვით მიმართა „მთავარი არხის“ დამფუძნებელმა, ნიკა გვარამიამ. ფეისბუკ პოსტში გვარიამიამ ჰკითხა იოსელიანს, მიაჩნდა თუ არა ის პოლიტპატიმრად.
დღეს იოსელიანმა ასევე ფეისბუკზე დაწერა, რომ სამმა ადამიანმა — თავად გვარამიამ, ხატია დეკანოიძემ და ანა წითლიძემ — დაუსვეს სხვადასხვა კითვები, მათ შორის, რუსულ კანონსა და მიხეილ სააკაშვილზე. ის მათ საჯაროდ პასუხობს:
„ნიკა, გამარჯობა, ნამდვილად სწორია, პატიმრობაში მყოფმა ადამიანმა საჯაროდ დაუსვას შეკითხვები სახალხო დამცველობის კანდიდატს. მეც მზად ვარ, საჯაროდ დასმულ ყველა შეკითხვას, პასუხი ასევე საჯაროდ გავცე. მიმაჩნია, რომ ჩემი განცხადებები შენს საქმესთან დაკავშირებით არასდროს ტოვებდა ორაზროვან შთაბეჭდილებას, მაგრამ ვხვდები, საშუალება არ გქონდა ყველაფრისთვის მიგედევნებინა თვალი.
შენი დაპატიმრების პირველი დღიდან მეც, ისე როგორც ალეკო ელისაშვილს, არაერთხელ გაგვიცია მკაფიო პასუხი შენს შეკითხვაზე და კიდევ ერთხელ, როგორც მოქმედი პოლიტიკოსი და სახალხო დამცველობის კანდიდატი ვაფიქსირებ, რომ შენი პატიმრობა არის პოლიტიკური მოტივებით ნაკარნახევი, არანაირი წინაპირობა წარდგენილი ბრალის ფარგლებში, გამოყენებული ყოფილიყო პატიმრობა, როგორც სასჯელის ზომა, არ არსებობდა.
რაც შეეხება ტექსტის იმ ნაწილს, უნდა გქონდეს თუ არა ჩემი იმედი სახალხო დამცველად არჩევის შემთხვევაში, მინდა სრული პასუხისმგებლობით განვაცხადო, რომ ჩემი იმედი უნდა გქონდეს არა მარტო შენ, არამედ ყველა პატიმარს, რომელიც დღეს სასჯელაღსრულების დაწესებულებაში იმყოფება. მე ვიქნები ჩემთვის მონიჭებული მანდატის ფარგლებში, მათი უფლებების დაცვაზე ეფექტური ზედამხედველი. დაბოლოს, მინდა გისურვო მხნეობა და მალე განთავისუფლება პატიმრობისგან, რომელსაც ვთვლი, რომ ღირსეულად იტან“, — აცხადებს ლევან იოსელიანი.
იოსელიანი ასევე ამბობს, რომ მასაც და მის პარტია „მოქალაქეებს“ ერთმნიშვნელოვნად უარყოფითი დამოკიდებულებ აქვს ე.წ. აგენტების რუსული კანონის მიმართ.
„ის საფრთხეს უქმნის ევროპულ პერსპექტივას, ახდენს სამოქალაქო საზოგადოების დისკრედიტაციას და ემსახურება მათთვის ჯაშუშის იარლიყის მიკერებას.
რაც შეეხება სააკაშვილის ნაწილს, ჩვენი პოზიცია ცნობილია: ის არ მიგვაჩნია პოლიტპატიმრად. თუმცა ვთვლით, რომ სახელმწიფომ ყველაფერი უნდა გააკეთოს, რომ უზრუნველყოს მისი ჯანმრთელობის დაცვა და მისთვის ყველა ტიპის სამედიცინო მომსახურების მიწოდება, იქნება ეს ქვეყნის შიგნით თუ ქვეყნის გარეთ. ასევე, დავძენ, რომ სახალხო დამცველის არცერთ ანგარიშში არ გვხვდება მისი, როგორც პოლიტიკურ პატიმრად შეფასება.
რაც შეეხება უმცირესობების დაცვის საკითხს, ჩემი შეხედულებით სახალხო დამცველის ინსტიტუტის უმთავრესი ამოცანა და მიზანი სწორედ მათი და საზოგადოების ყველა სხვა დაუცველი ჯგუფის უფლებების დაცვა და რეალიზებაა, რომ მათ ჰქონდეთ შესაძლებლობა, სხვებთან ერთად თანასწორად ისარგებლონ თავიანთი უფლებებით, რაც უზრუნველყოფს საზოგადოებრივ ცხოვრებაში მათ სრულყოფილ მონაწილეობას“, – წერს იოსელიანი.
რაც შეეხება ანა წითლიძეს კითხვას, იოსელიანი ამბობს, რომ – „ მე არ ვიქნები ნეიტრალური, ვერ მივიღებ პრეტენზიას იმ პოლიტიკური ძალისგან, რომელმაც მეცხრე მოწვევის პარლამენტში წინა სახალხო დამცველს სწორედ არანეიტრალურობის მოტივით არ დაუჭირა მხარი. თუმცა, ამავე დროს, მთხოვ ვიყო ლომჯარია, ბურჯანაძე და ჯანეზაშვილი. ჩემი სახალხო დამცველად არჩევის შემთხვევაში ნამდვილად ვერ გავხდები ვერც ლომჯარია, ვერც ბურჯანაძე და ვერც ჯანეზაშვილი, ვინაიდან ვიყავი, ვარ და ვიქნები ლევან იოსელიანი“.
