ლიეტუველი ევროპარლამენტარი, Renew Europe Group-ის წევრი, პეტრას აუსტრევიჩიუსი აცხადებს, რომ იმისათვის, რათა საქართველოს ევროპული სახე, ექსპრეზიდენტ მიხეილ სააკაშვილს კი სიცოცხლე შეუნარჩუნდეს, საჭიროა ამ უკანასკნელის დაუყოვნებლივ სამკურნალოდ საზღვარგარეთ გადაყვანა.

„საქართველოს დღევანდელი მთავრობა ამტკიცებს, რომ პროევროპულია და დასავლეთთან უფრო მჭიდრო კავშირი სურს. ამავდროულად, საზოგადოება ღრმად პოლარიზებულია და გაცხარებული პოლიტიკური ბრძოლები ელემენტარულ პოლიტიკური კულტურის მიღმაა. მიხეილ სააკაშვილი, ყოფილი პრეზიდენტი, რომელმაც გამოაცოცხლა საქართველო და შეცვალა ქვეყანა ისე, რომ ვერ იცნობდით, 16 თვეა, ციხეში იტანჯება. არის ეს პოლიტიკური მეტოქისადმი ანგარიშსწორება თუ წარსულში დაბრუნება?“, — იკითხა აუსტრევიჩიუსმა.

მიხეილ სააკაშვილის ირგვლივ არსებულ სიტუაციასთან დაკავშირებით  დღეს, 2 თებერვალს, ევროპარლამენტში გადაუდებელი დებატები გაიმართა. დეპუტატებმა საქართველოს ხელისუფლებას ექსპრეზიდენტის საზღვარგარეთ დაუყოვნებლივ გადაყვანისკენ მოუწოდეს.