თბილისში A კატეგორიის ტაქსის მძღოლებს მგზავრის აყვანისა და ჩასმის მიზნით ავტობუსის ზოლში [ბასლეინი] გადასვლისა და გაჩერების უფლება ექნებათ. ამის შესახებ თბილისის მერმა, კახა კალაძემ 2 თებერვალს ტაქსების რეფორმის მესამე ეტაპის შესახებ გამართულ პრეზენტაციაზე განაცხადა.
“პირველი აპრილიდან ვგეგმავთ, რომ A კატეგორიის ტაქსის მძღოლებს ჰქონდეთ შესაძლებლობა საავტობუსე ზოლში გადავიდეს, გააჩეროს, მგზავრი აიყვანოს ან ჩამოსვას. მხოლოდ მგზავრის აყვანა-ჩამოსმა შეეძლება A კატეგორიის, ანუ თეთრი ფერის ტაქსის მძღოლებს”, – თქვა კალაძემ.
ამასთან, რეფორმის თანახმად, პირველი აპრილიდან თბილისში A კატეგორიის ტაქსებზე მუნიციპალიტეტი ერთჯერადად გასცემს ახალი სისტემით გათვალისწინებულ A კატეგორიის ნებართვებს.
